10 الثورة الطيبه

السلام عليكم ورحمة الله



مبدئيا دول رسمتين رسمتهم مؤخرا  اعتقد ان فيهم شوية من روح الايام اللى عايشينها



ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نقطه ومن اول السطر

كتير من المشاهد وكتير من جو اللخبطه  كتير من الاراء كتير من كل حاجه  بمعنى ادق ماسورة من كل حاجه وانفجرت
فى اعتقادى انه حاجه طبيعيه بعد ثورة .. بعد تهميش وسحق  وتجريف لكل ماهو (( فيه الرمق ) زى مابيتقال ... هتكلم فى كذا نقطه وبسرعه

* انا موافق على المرسوم اللى هيخرج بتجريم بعض حالات التجمهر والاعتصام  وشايف انه كان لازم يخرج للنور قبل كدا بشوية ودا لانى مقتنع تماما بان فى شىء بيدبر او هو مدبر بالفعل وموافق ومقتنع بالثورة المضاده وان كنت  شايف انها مش منظمة وانها    محاولة للبقاء _ بقاء المفسدين اللى بيحافظوا على اى شىء يبقيهم بعيدا عن المساءلة _  .. غير كدا  اعتقد برضه ان استقرار مصر وده  هدفنا كلنا انما لازم فرصه للحكومة  .. فرصه تسمحلها بتنفيذ خطوات محدده علشان نقدر نعدى الفتره دى باقل الخساير وشخصيا انا واثق تمام الثقه فى الدكتور عصام شرف وفى حكومته ..

* واضح ان الشعب المصرى بحكم انه شعب طيب .. يوم ما قام بثورة عمل ثورة طيبه ويوم ما انتقل الحكم للمجلس العسكرى اللى هو كمان طيب  شايف انه بيتعامل مع بعض الملفات بنفس الطيبه ......  برغم انه مش وقت الطيبه خالص مع بعض رؤس الفساد رموز وكسور واس الفساد والخراب اللى  كنا عايشين فيه .......  شخصيات ريحتها طالعه _ فتحى سرور - على الدين هلال اللى محدش بيجيب  سيرته - صفوت الغير شريف - زكريا عزمى - مفيد شهاب  ترزى قوانين ال مبارك وغيرهم  وغيرهم ... الناس دى لازم يطبق عليهم قانون الطوارىء فورا ... الناس دى كانت بتحكمنا بلا قانون ولا دستور ولا شرع يبقى من الاولى اننا نحاكمهم  بنفس اسلوبهم يعنى مش لازم يتمسك عليهم ورق ولا تقارير .. الناس دى ريحة الفساد  سابقهم فى كل مكان .

*  شباب الثورة واللى لاااااازم يكونوا ممثلين وبقوة فى  مجلس الشعب القادم ... لازم ينزلوا الشارع وخصوصا فى القرى وارياف مصر .. اغلبية الشعب المصر واغلبية الاصوات ... لازم يكون التواجد بكثره لاننا لو فضلنا فى القاهره ونتكلم كلام كبير - كلام ناس مثقفه وبتاع - مش هنقدم ولا هناخر لان الطبقه الفقيره من ابناء مصر اللى موجوده فى الارياف هى القوة الضاربه فى اى انتخابات وحدش يقول مفيش وقت ولا فرصه ... لا فى وقت وفى فرصه كبيره  بس نتحرك ونتفق ونتحد .

*الاعلام دورة كبير جدا .. الاعلام المحترم طبعا واللى له رصيد من الثقه عند الناس ... تثقيف الناس فى الديموقراطيه وممارستها وتقبل واحترام الراى والراى لاخر .. دى مهمه مش سهله  واعتقد انها لازم تكون فى اولويات الاعلام الفتره الجايه ..

* كفااااااايه بقى جروبات وصفحات على الفيس بوك - حد يقفل الماسوره دى يا اخوانا ... مش كدا 
واخيرا . وطى صوت التليفزيون واسمعنا من التليفون 

4 بين نعم ولا ......

السلام عليكم ورحمة الله بوركاته

وبدأناها بتحية الاسلام علشان محدش يقول حاجه ولا حاجه اصل انا بعيد عنكم واحد من اللى كانوا بيأيدوا لفكرة (
لا) للتعديلات الدستورية .. واللى اتضح اننا وللاسف اصبحنا قلة مندسه ضد الاسلام ومع الملحدين اصحاب تاشيرات كندا وامريكا

فى البداية انا مازلت عند تفاؤلى ودا لان   اصحاب نعم بدأوا كمان يقولوا ان اصحاب لا ناس متشائمين وبتاع .. الموضوع بإختصار وبرغم نجاح المصريين فى اول اختبار ديموقراطى بعد الثوره الا ان الاستفتاء وضح شوية امور منمها ان الشعب المصرى معندوش ثقافة الديموقراطيه بمعنى تانى ويؤسفنى انى استعير كلمة الريئس المخلوع هو ان الشعب غير مؤهل لممارسة الديموقراطيه وده نتيجة طبيعيه لسياسة التهميش اللى عيشنا فيها نظام عصابة مبارك واعوانه .. احنا رائعين فى ممارسة الاحتشاد (
اللمه بمعنى ادق) وده شوفناه فى ميادين مصر وشوفناه فى الاستفتاء والطوابير اللى ملهاش اخر ... دى حاجه لازم نعترف بيها ولازم اعلامنا يعترف بيها علشان نقدر نواجهها ونمشى فى الطريق الصح لانى لاحظت ان الاعلام بيحاول يغمى عنيه عن الحقيقه دى ولازم نعرف انه فى فرق بين الاحتشاد وبين ممارسة الديموقراطيه احنا صحيح غير مؤهلين كليا للمارسة الديموقراطيه لكن عندنا استعداد واستعداد كبير جداااااا


اللى حصل انهارده انى شوفت فيديو للشيخ ممحمد حسين يعقوب وهو واحد من الناس اللى بحترمها جدا ومكانته عالية عندى وعند كل المسلمين ولكن بصراحه اتصدمت ... استوقفتنى بعض الكلمات اللى جات فى الخطبه وهى مثلا برامجهم وجرائدهم وديموقراطيتهم وغزوة الصناديق .. والناس اختارت الدين ...!!
هو فى ايه ..؟
هو حاجه من اتنين يا اما احنا ((
معاشر من قالوا لا )) مش فاهمين يا اما هما (( معاشر من قالوا نعم )) مش فاهمين
اصل انا الى فهمته اننا الاتنين هدفنا مصلحة مصر واستقرار مصر انا شايفها انها هتيجى بدستور جديد ونبدا على مية بيضه زى ما بيقولوا ويكون فى فرصه لتوعية الناس بالديموقراطيه وتقبل الاخر وما الى ذلك علشان نبدا نبنى على قاعده سليمه ..   .. وهما شايفنها انها بتعديل مؤقت وبانتخابات مبكرة واستقرار مبكر .. دا اللى كنت فاهمه قبل الاستفتاء وطول فترة الحوار على الاستفتاء

فوجئت بان لا فى ناس بتقول انت رايح الاستفتاء تقول نعم ولا لا للدين نعم ولا لا للاسلام

بصراحه الفيديو صادم .. على الاقل بالنسبة ليا ومش عارف هو انا اللى كنت فاهمه صح ولا انا كنت فاهم غلط ولا ايه اللى بيحصل




ــــــــــــــــــــــــــــــــــــــــــ


مطلوب من المجلس الاعلى فى الفتره الجايه ومع الاعلان الدستورى لازم  يكون فى قوانين حاسمة فى مسألة خلط الدين فى السياسة بالشكل ده
مطلوب من الاعلام تثقيف الناس فى الديموقراطيه وتقبل الراى الاخر
مطلوب من كل الاحزاب وكل القوى السياسية وكل الشباب النزول للشارع وخصوصا فى المناطق الريفيه والصعيد 
مطلوب من مشايخنا وعلمائنا الاجلاء ان يفرقوا بين الاختلاف فى الراى فى السياسه وبين الخروج عن الدين  






دا الفيديو



1 الناس فى بلدى ..... جعــــــانيييين ديموقراطيه











انهارده ومع ممارسة اول استحقاق للشعب المصرى من ثورة 25 يناير وبغض النظر عن نعم ولا لا ... اقدر اقول ان  تفاؤلى بيزيد يوم عن يوم  والحمد لله قدرنا ننجح فى اول اختبار فى ممارسة الديموقراطيه هو صحيح لسه منقدرش نقول نجحنا ميه فى الميه وان النجاح ده نقدر نأكده لما الكل يتقبل النتيجه مهما كانت بس المؤشرات بتقول اننا ان شاء الله فى الطريق الصحيح ... 

بتمنى ان الاعلام  يمارس دوره فى تثقيف الناس  فى الديموقراطيه  وتقبل راى الاخر وعدم فرض الراى  بالارهاب ولا بالتخوين زى ما للاسف حصلت فى بعض الاحيان الفتره الاخيره  .. بس برضه متفائل الحمد لله 

الناس فى مصر بجد جعانين وعطشانين ديموقراطيه وحريه ... مصر بتتنفس ديموقراطيه انهارده  ربنا  يكملها على خير 

2 للشرفاء فى قولبنا وعيوننا داائماً مكان ...

لو كل كلب عوى ألقمته حجرا لأصبح الصخر.. مثقالٌ بدينار
ارجوووك كمل طريقك علشانا وعلشان مصر .. استمر واحنا معاك والله وربنا يوفقك ويوفق كل الشرفاء اللى مصر امانه فى ايديهم


مكالمة المستشار جودت الملط (رئيس الجهاز المركزى للمحاسبات ) لبرنامج الحياة اليوم

1 كلمة الشيخ الشعراوى للمصريين بعد ثورتهم

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .