8 نوم الظالم عباده !

بنقول كلام كتير وبطريقه تلقائيه تقريبا من غير
ما نفكر فى معناه
زى مثلا
( تلت التلاته كام )"
( من رابع المستحيلات )

" نوم الظالم عبـــــــــــــــــــاده "
الجمله دى بصراحه هى اللى شدد انتباهى اوى
انا بحثت فى جوجل عن معناها بس لقيت التوبيكات اللى على معناها
عبارة عن اسئله والاعضاء بيقولوا اراء لهم
بس مش مبنيه على اساس علمى
المهم فضلت ورا الموضوع لغايه لما جبت التفسير العلمى لمعنى الجمله دى
من استاذ دكتور مخ واعصاب فى المنصورة
المعنى العام الجمله
ان الانسان الظالم وهو صاحى بيعمل اعمال تغضب ربنا ويظلم الناس بافعاله وبيرتكب الاخطاء
وهو نايم بقى بيرحم الناس من شره
وبالتالى مش بياخد سيئات على اعماله لانه مش بيعمل حاجه اصلا
دا كلام تمام اوى وهو صح مش غلط بس مش على اساس علمى
التفسير
ان ربنا سبحانه وتعالى خلق الانسان و سخر جميع اعضاءه تحت خدمته
من ايدين ورجلين وحواس واجهزة واعضاء داخليه
وعلشان كدا الانسان بيتحاسب على افعاله لان هو اللى بيسطير على
نفسه
الاساس العلمى بقى لمعنى الجمله
ان عقل الانسان الباطن بيرسل اشارات للمخ والمخ بيرسل اشارات لباقى الاعضاء
عن طريق خلايا الجسم للقيام بعمل معين
" زى مثلا رد فعل الايد لو مسك شىء سخن "
يبقى كل عمل الانسان بيعمله بيكون نابع من ارادته
لما ينام بقى الخلايا بتسير فى مجراها الطبيعي
دون تدخل من الانسان
مجراها الطبيعي دا اللى هو دوران الخلايا داخل الجسم
في اتجاه طواف الحجاج حول الكعبه
" حركه عكس عقارب الساعه "
ودى طريقه تسبيح الخلايا جوا جسم الانسان
والطريقه دى ما بتحصلش الا والانسان نايم
ودى طبعا كلها حسنات للشخص النايم
علشان كدا فعلاااااااااااا
" نوم الظالم عبــــــــــــــــــــــــاده "

الحمد لله

9 كل سنه وانتوا طيبييين


كل سنه وانتوا جميــــــعا طيبين
وبخير والف صحه يارب
بصراحه كانت نيتى لما دخلت ادون دلوقتى
انى اتكلم فى موضوع تانى خالص بعد المعايده
الموضوع عن
الحج والشعائر المقدسه

وان من ضمن الحجاج مصريين وجزائريين
وكان ليا شويه تعليقات بعد ما قريت العنوان دا فى جريده المصري اليوم انهارده
بس رجعت تانى وقولت
نفكر فى العيد ونفرح به بعيد عن التفكير مؤقتا فى اللى فات
ويارب يكون عيد سعيد علينا كلنا
عايزة اعرف بس اخبار الاضحيات اييييييه ؟

18 عيد ملاد مدونتى



انهارده مدونتى بتكمل السنه الاولى
يعنى  عمرها دلوقتى سنه
   
مش عارف اذا  كنت عملت اللى اتمنته للمدونه دى  لما عملتها ولا لا
بس  بجد انا فرحان  .. وحاسس انى بحتفل بعيد ميلاد  حد اعرفه اوى
ونفسى اجيبلها هدية حلوه 

دا اول بوست ليا فى المدونه وكان بتاريخ 13/10/2008

مدون جديد

م
وخلال السنه دى اكييييييييييييييييييد مليون فى المية إستفدت حاجات كتير وعرفت ناس بجد بحترمهم جداا وبحترم تفكيرهم وعقولهم جدا جدا  ....  يمكن مقدرتش انشر المدونة اوى وكدا ودا  لان السنه اللى فاتت دى من اصعب السنين اللى مرت عليا فى كل حاجه ( من غير تفاصيل يعنى  ) ومجرد اللى وصلتله  من خلال المدونه فى السنه دى وفــ وسط الظروف دى   انا بعتبره إنجاز

ماعلينا

المهم يعنى عاوز اقول
كل سنه وانتى طيبه  يامدونتى العزيزه
كل سنه وانتى حبيبتى ومعايا
وكل سنه وانتى أنفع لكل اللى يقرا فيكى كلمه
وكل سنه وانتى متحملانى
و .........
وبس

11 قص .... ولزق

السلام عليكم ورحمة الله وبركاته

ازيكم جميعااااااا
 _________________

'SahabatMusleem'/


فيلم قص ولزق .. شوفته اول مره كانت السنه اللى فاتت لما كان بيعرض على قناة سينما بتاعة قنوات اى آر تى ... وعلشان محدش يقول انى عندى كارت بقى وياخد عنى فكره   وحشه  الفيلم اتفرجت عليه عن طريق وصلة الدش  المركزى ( يعنى ابتكار  مصرى لمقاومة الاحتكار الاعلامى )        'SahabatMusleem'/ حتى كان ايامها اعلان عمرو خالد بتاع الوصلة .............  وكان نفسى اتكلم من وقتها على الفيلم ده بس معرفتش   وامبارح بس شوفت الفيلم تانى صدفه   .... المهم ....... انا مش هتكلم عن الفيلم  وتفاصيله ولا عن الحاله الفنية الغاية فى الروعه اللى ظهر فيها ا  بكل مافيه سيناريو وحوار واداء تمثيلى واخراج وتصوير وكل ادوات صناعة الفيلم ... ويمكن كانت حالة شاذه وهى اعجابى بفيلم من الافلام الجديده عموما  وقتها يعنى ..


 ..حتى  انا بعتبر الفيلم مجملاً من احسن افلام السينما المصرية على مر تاريخها ...
( من وجه نظرى المتواضعه طبعا
هتكلم بس عن مشهد فى الفيلم وهو مشهد لشريف منير وفتحى عبد الوهاب ابطال الفيلم ...
الحوار اللى  دار بينهم فى دقايق  بيلخص  تفاصيل حياة معظم شباب مصر وبيوضح فى نظرى  أد ايه المعاناه  اللى ممكن نمر بيها عموما فى  حياتنا ..الطبيعى فيه انه بيكون احسن عمر بيمر بيه الانسان


السؤال اللى بيساله شريف منير فى المشهد ده خلانى وقتها افكر كتير  وخلانى اسال  نفس سؤاله ...!!  وقولت هى فعلا البلد دى مفيهاش حاجه تديهالنا .... ولا إحنا اللى مش عارفين ناخد منها حاجه ..؟؟


لما سمعت إجابة فتحى عبد الوهاب  أقنعتنى


بس  لإمتى هتفضل الاجابه دى  موجوده ..؟!!
'SahabatMusleem'/


اسيبكم مع المشهد


17 من خلف الشُرفه



من وراء الشُرفة تنظر اليه ..... تترقبه

تتابع بشوق كل فعل يفعله ... وكل ابتسامة ترتسم على شفتيه ... كل شىء حولة .. ثابت او متحرك ..

نهاراٌ وليلاٌ تنظر الى غرفته ... تحتضن بنظراتها مكتبهُ ..... سريره..... ملابسه التى خلف الباب

فقد مر على ماهى فيه عام كلمل ... حتى انها تحفظ كل اهتماماته ... اشياءه المفضله .. مايسعده .. مايحزنه

صارت أستاذة فى عمل " أُم على " حلوتة المفضله ..

تغمض عينيها كل ليلة على صورتة .. تنطق إسمهُ مئات المرات .. حتى يكون بطل أحلامها لهذه الليله ...

لا تنام الا اذا همست لها الدنيا وأكدت لها بأنهُ سوف يأتيها فى المنام .. وأنها سوف تضع على وجنتيه تلك القُبلة التى تعودت ان تعطيه إياها كل ليله ...... وأنه سوف يحتضنها .. ويضمها اليه .. وانهم سوف يكونا هذه الليله أسعد حبيبين على وجه الارض.

تبتسم ... تُقبل صورتة ..... تسمح بيديها دمعةٍ شاردة تنزل من عينيها كل ليلة ... وكأنها تأذن لها بالنوم ... أحبت تلك الدمعة كثيراٌ
..
لا تكل .. ولا يصيبها الملل ... يأتى الصباح .... تنتظر بالساعات خلف شرفتها وعينيها معلقتين بغرفته .. على أمل ان تتلاقا اعينهما وهذه المره لن تتضيعها كباقى المرات... فسوف تتحدث اليه .. علهُ يشعر بها .. او ان يقول لها شىء تعيش عليه لبرهةِ من الزمن..

ها هو قدأتى فى موعده ... إنهُ يدخل البيت والآن يصعد الدرج..

تتأهب هى وتستعد .. نبضات قلبها تكاد تُسمع من بالدنيا كُلها ..

تُغمض عينيها للحظه .. تضع يدها على قلبها .. تقول له إهدأ قليلاً

يستجيب قلبها ....

تقف فى الشُرفه ... تتطاير شعرها على وجهها
تبتسم..

تتأهب للتحدث إليه ..

يدخل الغرفة مبتسماً إبتسامة ٌ عريضه..... خلفه أمه .. تمسك بيديها عُلبة ذهب .. تضحك .... تحتضنه ... تقبله ...البيت يمتلأ زغاريط ... تأتى شقيقته ... تحتضنه .... تقبله
البيت يمتلأ بالمهنئين

الكل يقول له ...


ألف مبروك ......

10 عزاء واجب

بسم الله الرحمن الرحيم
حبيت اتقدم بخالص عزائى .. لكل ضحايا الاعصاروالفيضان اللى ضرب المغرب العربى وخلف خساير مادية وبشرية كتيره
لكل اهلنا فى موريتانيا والمغرب والجزائر وتونس بجد قلوبنا مع الضحايا .. ونسال الله القدير رب العرش العظيم ان يحفظكم ويرحمكم برحمتة ... وقدر الله وماشاء فعل

9 القــــــــــــــــذافـــــــــــــــــــــى







مين اللى شاف خطاب الرئيس الليبى معمر القذافى فى الامم المتحده انهارده؟



هو اساسا لسه خالص حالا .. كنت ماسك الريموت وعمال بقلب فى القنوات ... لقيت الرئيس الليبى بيقول كلمته .. انا كنت اتفرجت شوية على خطاب اوباما ولقيته كلام مكرر وسمعته قبل كدا فقمت .....


انما بقى الرئيس الليبى معمر القذافى ... بصراحه والله قال شوية كلام زى الفل ... الخطاب طبعااااااااااا تعدى الوقت المسموح بيه واللى كان المفروض ربع ساعه ......... دا قعد اكتر من ساعه .ولما طلب منه الاختصار، رفض القذافي الامتثال متحججا بان اوباما هو ايضا تجاوز الوقت اوباما قعد اربعين دقيقه


اول اللى لفت انتباهى الورق الكتييييير الاصفر اللى كان موجود ادامه ( فكرنى لما كنت باجى اذاكر فى ماده ومش فاهم فيها حاجه )

يمكن انا مسمعتش الخطاب من اوله لكن لحقت جزء كبير منه

ملخص كلامه .. هوبيطالب باعادة تنظيم وهيكلة الامم المتحده ( من اول وجديد يعنى ) كليا .. واعادة النظر فى اهدافها وازاى تبقى موجوده ويحصل كل الخراب والحروب اللى بتحصل دى وطبعا برئاسة الدول الكبرى
لحقتة وهو بيتكلم عن مقر الامم المتحده ... قال انه بيطالب بنقل مقر الام المتحده من نيويورك وقال بما ان امريكا دوله مستهدفه من الارهابيين ومبنى الامم المتحده كمان مستهدف .. طيب ليه ما ننقلش المقر ده لاى مكان تانى مش مستهدف وبرر كدا بان كل الوفود المشاركه اتعرضت لاجراءات بايخه فى السفر .. واثناء وصولهم لامريكا ... وقال ليه يعنى نطير 14 ساعه ؟

واقترح نقل المقر فى فيينا او مدينة سيرت الليبيه ...

* كان من وقت للتانى بيتنرفز ويخبط المنصه اللى قدامه بقوة ...

قال كمان انه بطالب بان يكون مجلس الامن مجرد اداه لتطبيق قرارات الامم المتحده اللى هتكون خارجه من الامم المتحده بالاغلبيه ومش بطريقة الخمس اعضاء الدائمين اللى فى مجلس الامن ...

قال احنا مش حوانات عايشين فى زريبة ..... وكررها كام مره

طالب الامم المتحده تحقق فى كل الحروب والمجازر والاغتيالات اللى وقعت بعد قيام الامم المتحده ... وشكك فى قدرة الامم المتحده ...

طالب بالتحقيق فى العدوان الثلاثى على مصر وازاى تقوم دولتين عضوتين فى الامم المتحده بالهجوم على مصر لمجرد انها مارست حقها واممت قناة السويس اللى موجوده فى ارضها... ( عجبنى اوى هنا )

والتحقيق فى الحرب على يوغسلافيا ... والحرب على العراق .. وعلى افغانستان ... وفيتنام

وطالب بالتحقيق فى الحروب دى ومحاكمة المتسببين علشان يبقى فى مصداقية للامم المتحده وعلشان يضمن ان حاجه زى دى متتكررش تانى ... وقال تانى ( احنا مش حيوانات )

وطالب بالتحقيق فى مجازر صبرا وشاتيلا ... وغزة وقال لازم المجرمين يتحاسبوا .. لانهم معروفين وقال ليه مش بيتحولوا لمحكمة الجنايات الدوليه ... وسال هى موجوده علشان البشير وعلشان رئيس يوغسلافيا وعلشان الدول الفقيره بس ؟؟ وقال لو هى كدا يبقى مش هنعترف بيها .. لازم الكل يخضعوا لمحكمة الجنايات الدوليه ..

اتهم امريكا والدول الكبرى بدخول الامم المتحده فى قضية الحريرى ... وسال هى لبنان معندهاش شرطة وقضاء علشان تحل القضية ..؟؟ وقال ان التدخل ده كان سببه معاقبة سوريا فى الاساس ..

.. جه موضوع فلسطين بقى ... وقال ان الحل الوحيد هو دولة واحده يعيش فيها اليهود والفلسطينين يهود ومسلمين ومسيحين ويرجع كل اللاجئين الفلسطينين ارضهم وتكون دوله واحده واكد صعوبة حل دولتين لان مفيش حدود ممكن تفصل دولتين هما اصلا داخلين فى بعض

.......... وراح مطلع كتاب ابيض كدا وقال دا فى وجهة نظرى وفيه الحل ,, وراح متدير ورامى الكتاب فوق على المنصه ... بنرفزه ............ القاعه كلها ضحكت على الموقف
فى الوقت دا بقى راح ساكت شوية واتكلم بصوت عالى وبسرعه .... انتم اللى بتكرهوا اليهود ( الاوربيين يعنى ) انتوا اللى حرقتوهم وانتم اللى طردتوهم ........ احنا عمرنا ماكرهنا اليهود ...... احنا ابناء عمومه ..... واحنا اللى اويناهم من الرومان ...... العرب اللى احتضنوهم .... وهييجى اليوم اللى هيحتاج فيه اليهود للعرب.



..... نسيت فى موضوع الاغتيالات .. طالب بالتحقيق فى مقتل الرئيس الامريكى كيندى .. وقال اننا عرفنا ان سبب قتله هو لانه كان ناوى يفتش مفاعل ديمونة الاسرائيلى ...

بس بجد كان خطاب جامد وكانت اراءه بسيطه بيفكر فيها المواطن العادى وخصوصا موضوع العداله اللى بيطالب بيه فى الامم المتحده وان حق الفيتو يبقى موجود مع جميع الاعضاء ... وان المحكمة الدوليه لازم يخضع ليها كل مدان ..


دى كانت لمحة كدا على مجمل الخطاب بتاع الرئيس الليبى معمر القذافى ... احييه عليه بصراحه



5 تدوينة صغنونه

كل سنه وكلكم بخير يارب وان شاء الله يكون عيد مبروك علينا جميعا


وعلى اخواتنا المستضعفين فى كل مكان على الارض




...............................










  • الوزير فاروق حسنى وترشيحه لمنصب الأمين العام لمنظمة الأمم المتحدة للتربية والثقافة والعلوم "اليونسكو


موضوع كبير اخد كلام كتير وجدل اكتر ... يمكن ميكنش من اهتمامات المواطن العادى ( لان الغالبيه يعنى ميعرفش ان فى ثقافه اساسا) الموضوع فيه جدل كتير يمكن لانه متعلق بشخصيه وزير ( قريب من النظام ) طول الوقت فى جدل عليه وعلى مواقفه واراءه فى شوية حاجات كدا .... منها مثلا موقفه اللى قلب الشعب كله عليه من الحجاب وبوصفه له بانه مظهر من مظاهر التخلف والعوده للوراء .. اللى بعد كدا نفاه وقال انه كان كلام ليس للنشر واللى فى حواره للمصرى اليوم من كام يوم قال انه معندوش اعتراض على الحجاب ولكنه بيرفض النقاب تماما ... بالاضافة طبعا لانه من رجال الرئيس (22 سنه وزير ثقافه ) واللى طبعا كلنا عارفين انهم معندهمش مانع فى التطبيع مع اسرائيل .... وكمان دعوته للموسيقار الاسرائيلى لاحياء حفله فى دار الاوبرا .... وحضوره افتتاح معرض عن نابليون ومصر احتفال بذكرى الحمله الفرنسيه على مصر واللى كتب عنه وقتها الاستاذ فهمى هويدى بانه اهانه للذاكرة الوطنيه ..... وتراجعه عن كلمة قالها فى مجلس الشعب لنائب اخوانى لما قاله النائب ان فى كتب اسرائيليه فى المكتبات فى مصر والوزير قاله لولقيت الكتب دى هحرقها بايدى ... و و و



انا كنت بسال مثلا يعنى احنا كمصريين نفرح بانه يكون فى المنصب ده مواطن مصرى على الرغم من انه صاحب المواقف اللى فوق دى والمفرو ض نسانده ونفرح بكدا ...؟ ولا نخاف انه ينجح ويقدم تنازلات ( دا اكيد يعنى ) لو نجح وتكون مواقفه محسوبة علينا كمصريين ومسلمين خصوصا انه هيتعامل مع الحفريات الاسرائيليه تحت المسجد الاقصى .. ومع تهويد القدس وطمس الطابع العربى فيها ... وبصراحه بعد ما اسرائيل اعلنت انها هتوقف الحمله اللى كانت اعلنتها ضده دى حاجه تعمل قلق لان اسرائيل مش بتعمل حاجهه لله يعنى ... عموما هو الجوله الرابعه انهارده وعلى راى ستى .... بكره نقعد على الحيطه ونسمع الزيطه ..!!


____________________________________________



  • المستشار محمود الخضيرى استقال


المستشار محمود الخضيرى واحد من قضاة مصر المحترمين اللى دخلوا قلوب كل المصريين بمواقفه اللى بتقول انه من القلائل المحترمين .. الخبر قراته انهارده زعلت .. بس لما عرفت ان السبب هو تغول النظام الحاكم وسلطته التنفيذية على السلطة القضائية ويأسه فى ان البلد حالها هيتصلح ... وان دا يعتبر احتجاج منه يعنى فرحت شوية وزاد اعجابى بيه وقولت دا خبر يفضح النظام فى مصر ويوضح بان البلد فعلا محتاجه وقفه من كل الشرفاء اللى زيه ..... بس زعلت تانى لما فكرت ولقيت انه يعتبر ياس واحباط خصوصا لما تيجى من شخصية معروف عنها وقوفها مع الحق باستمرار .... وبكدا يكون التوحش اللى وصلت ليه السلطه بقى شبح بيقف قدام كل اصوات الحق .. ياترى مين بعدك يا سيادة المستشار ؟

يمكن يكون موضوع بقى قديم شوية ... بس عموما انا مش هتكلم واغوص فيه يعنى .... يدوب بس هنشوف صورتين ليافطتين شوفتهم اول ما نزلت بلطيم ..




الاولى : موجوده فى كل شوارع بلطيم تقريبا للنائب حمدين صباحى بيهنىء الصايادين اللى حرروا نفسهم بايدهم مش بمساعدة حد ( وسلامى للشاطر حسن )





التانيه : موجوده فى شارع مكتب امين الحزب الوطنى فى بلطيم وفيها رجالة الوطنى بيهنوا الجهات السياديه على المحافظه على ارواح الصيادين وتحريرهم من القراصنه



نعمل استفتاء بقى ونقول تصدق مين فيهم ؟

10 أنا جيييييييييييت



بسم الله الرحمن الرحيم

=============


حالة من الفرح الحمد لله مسيطره عليا وانا بكتب الكلام ده من مصر ...... ( حيث أنى قد أتيت الى مصر قادما من المملكه العربيه السعوديه فى رحلة عمل ... لم تكن طويله)

من الاخر يعنى


بجد فى فرحه كبيره جوايا وانا بكتب الكلام ده .. بكتب عن عودتى لمصر وخصوصا لما تيجى فى شهر رمضان وايامه اللى فعلا مالهاش طعم بره مصر ... رجعت بعد تَمن شهور فى السعوديه طبعا ولانى كانت اول مره ليا خارج مصر اكيد اتعلمت حاجات جديده واكيد اكتسبت خبرات ... بتمنى من ربنا انها تساعدنى لما ارجع تانى ... انا مش هتكلم عن تفاصيل التمن شهور ( لانها تفاصيل لا يعلمها الا الله ) انا هتكلم بس عن رحلتنا واحنا راجعين وبقول رحلتنا وحنا راجعين لانى كنت نازل مصر مع الاستاذ عادل زوج اختى صاحب مدونة قول يا الم .. ( آه اصل العيله دلوقتى بقى فيها مدونين كتير)


ودا رابط المدونه لان مش عارف فى تقريبا عطل فى الروابط فى مدونتى مش عارف من ايه







الرحله فى مجملها وبرغم التعب اللى ملوش حدووووود بس كانت جميله واجمل مافيها انك تكون نازل بلدك ومشتاق لكل شبر فيها ولكل الناس اللى فيها ( دا كان احساسى والله )


إ تحركنا من تبوك بعد السحور رايحين على العقبه ( المفروض كنا هنركب من ضبا بس مكنش فى رحلات فى اليوم ده لمصر ) عادل نازل مصر بعربيته اللى اتحملت كتييييييير اوى فى الطريق خصوصا فى مصر طبعا يعنى ... كان معانا حاجات كتير ومعظمها لناس معارف .. وصلنا العقبه تقريبا فى حدود الساعه تسعه الصبح .. كنا بندعى نلاقى رحلة لمصر فى اقرب وقت علشان الانتظار فى الموانى والاماكن دى بيبقى صعب اوى خصوصا اننا فى رمضان وكان الجو حر جدااااا .. عادل طبعا بما انه كان قائد الرحله نزل هو يحجزلنا ويحجز للعربيه والرحله الوحيده اللى كانت ومها لمصر كانت فى عباره هتمشى الساعه تلاته يعنى قدامنا بتاع 6 ساعات انتظار ....... كتيييييييير اوى ... المهم مش عارف ازاى ربنا هدانا وقدرنا نستنى والوقت ماشى بسرعة السحلفه .. المهم عدى الوقت والعباره اتحركت الساعه خمسة تقريبا ..وكانت بطيئه جداااا بس مش مهم .. الاهم اننا رايحيين مصر وقضيت معظ الوقت فوق العباره اشوف المية والناس كان جو جميل اوى .

وصلنا نويبع تقريبا كانت الساعه 9 يعنى اخدنا اربع ساعات من العقبه لنويبع ..


نزلنا مصر وبدانا رحله بمليون رحله من اللى فات... بداناها بعسكرى قابلنا اول ما نزلنا من العباره بالعربيه


- هااا عاوزين تعدوا على الجهاز ولا بلاش ؟؟!!!!!


- لا بلاش

- طيب حمدلله على السلامه .

اخدله مبلغ الاخ .. مش مننا بس طبعا جينا للجمارك ( مش هتكلم عن تفاصيلها اوى لانها كانت يعنى ... كدا ) المهم يعنى محدش شافنا فى المينا الا وطلب فلوس بنفسه ( قمة البجاحه يعنى) بس طبعا بما اننا فى مصر مستغربناش الموقف


من اول عسكرى قابلنا فى المينا لاخر موظف خاتملنا الاوراق على بوابة الخروج .

عرفنا اننا فى مصر كمان لما مشينا على الطرق اللى ملهاش حل .. طبقا للمواصفات المصرية ... يعنى خمسين مطب لكل مواطن وميت حفره لكل فردة كاوتش .. واللى فى جيبك لعسكرى

ماعلينا


مش مهم ادينا مروحين كله يهون وبلاش نتكلم فى الحاجات دى دلوقتى خلينا فرحانين شوية...




انتهت الرحلة بوصولى بلطيم ( بلدى يعنى ) بعد اذان الظهر تقريبا ..






دا فيديو لشوية جبال وصخور روعه كانت فى الطريق تبصلها تحس انها مليانه وجوه واشكال











وده فديو واحنا داخلين على العقبه وشايفين قدامنا ايلات الاسرائيليه .. عادل كان له اقتراح باننا نجيب بلدوزرات ونردمها ... هنشوف كمان فندق طابا












اليكم شوية صور من الرحله بس كمان شوية









دى صورة العربيه واحنا نازلين نصلى الفجر فى الطريق








دى صور للجبال والصخور اللى فى الطريق






























واحنا داخلين العقبه والمبنى الابيض اللى فى الناحية التانيه ده فندق طابا












الراجل العجوز ده فكرنى بفيلم تايتانيك ... طول الرحلة واقف كدا يبص للبحر


الصورة دى واحنا فى نويبع قبل الخروج

3 إحنا بتوع التكاتك




خبر من اخبار المحروسه .. يستاهل يتقرأ وخصوصا التعليقات اللى عليه

اقرأوه

http://www.almasry-alyoum.com/article2.aspx?ArticleID=224625

4 بلا عنوان

زى اى حد وزى كل حد ...دايماااا دايما فى شخصيات او افراد بيظهروا فى حياتى .. بعرفهم يعنى طريق الشغل غالبا يعنى او عن طريق حد من صحابى .. او كان فى الدراسه او فى فترة الجيش..... المهم يعنى شوية من الشخصيات دى اقدر اقول عنها انها شخصيات اشبة بالكائنات الحية ( فى الظاهر يعنى ) لكن فى الاساس هى ميته ( مش ميته بس ........لا دى عفنت كمان ).......
اوقات تلاقيها متطفله ...... احيانا انتهازية .....اوقات كتير بارده لدرجة انها تنافس تلاجات كريازى ( مش عارف اذا كان فى حاجه اكتر من كريازى ولا لا )
من الشخصيات دى واللى قايلتهم مؤخرا هنا فى الشغل .. هو كائن غريب ... يمكن قابلت نوع منه قبل كدا فى مصر بس مكنش بالشكل دا ولا بالبرود دا ( ولا بالكرش ده )
هو واحد سورى الجنسية ( مع انى بحب سوريا والله ) بس هو بصراحه كرهنى فى نفسى شخصيا ...... المهم .... الكائن دا يمتاز عن يره من فصيلته بأنه بيمتلك كرش كبير جدااا يعنى اول ماتشوفه تقول انه حامل فى الشهر العشرين ....... وكمان عنده مخزون استرتيجى مهول من ا لبرود واللامبالاه يكفى بلدين تلاته ....
المخلوق الغريب ده واللى خلانى اتكلم عنه بالطريقه دى وفى رمضان كماان.. من اول الشخصيات اللى خلتنى افكر وانا قاعد فى انه لوكان فى اختراع او كرسى مثلا تقعد عليه ويبقى فى شاشه قدامك كدا فيها كل الشخصيات اللى عرفتهم فى حياتك تحت بعض كدا زى الياهو مثلا ... وانت بقى لو عاوز تعمل لحد اجنور او دليت .. ياسلاااااام
كنت قعدت كدا عملت الاول تقسيمه كدا لحياتى كانها ايميل مش مهم بقى ياهو ولا هوتميل ........ وجمعت كل الشخصيات دى فى مكان واحد وبضغطة واحده عملتلهم دليت من حياتى كلها ومن ذاكرتى اصلا ..........
مش عارف بقى هو ممكن الجهاز دا تبقى حقيقه ولا لا . . لو حقيقه هكون اول واحد يشتريه خصوصا لو كان اعلاناته فى التليفزيون ويكون سعرالبيع ثابت وسعر الشحن ثابت أينما كنت
بجد هيبقى اعظم اختراع فى التاريخ
غير الاخ ابو كرش دا فى شخصيات تانية اكيد ليها نصيب تجرب الموضوع دا واولهم طبعا وبدون شك كل مدرسين الرياضة اللى عرفتهم فى حياتى ( مع ان حبيبة قلبى هتبقى مدرسة رياضه ) بس يلا بقى يارب متزعلش بس
شكلى انا اللى هبدا اعمل الاختراع ده ....مش عارف اللى قولته دا نميمة ولا ايه بس كنت محتاج اكتُب الكلمتين دول ضرورى .

3 التليفزيون فى بيتى

انهارده الساعه اربعه كدا ( وانا جاى اتغدا يعنى ) ... قولت اقرا المصرى اليوم بسرعه ......... مع انى مليت من كل شىء اعرف من خلاله اخبار عن مصر ..... المهم فتحت الموقع وفضلت أقرا العناوين بسرعه كدا ... بعد ما قرات العناوين وهدخل بقى علشان اشوف اخبار الرياضه ... لفت انتباهى او حسيت انى قريت حاجه غريبه او حاجه متتصدقش يعنى ... المهم .. رجعت تانى اشوف ايه اللى وقفنى و خير اللهم اجعله خير .... ومعتقدش يعنى هييجى من ورا اسرائيل خير ابدا ........


الحوار ومافيه ... خبرين









دا بجد ولا ايه ...................!!!!!

اه والله العظيم دا بجد وشايف الناس واقفين قدام الكاميرا اهم وفرحانين انهم طالعين فى التليفزيون ( مش مهم بقى تليفزيون مين )

طب ايه ..؟

يعنى هى بقت كدا ......... عينى عينك كدا ........ لا وبشعار القناه التانية فى التليفزيون الاسرائيلى كمان... يانهار اسود

طيب هو ممكن التليفزيون المصرى يروح تل ابيب ويصور اى حاجه ..؟

طيب لو دى كانت قناة الجزيره مثلا مثلا يعنى .......... كان ايه حصل .؟

هو فى ايه بجد والله ... انا بتكلم جد ........ يعنى خلاص بقينا زى السكينه فى الحيلاوه ( على راى الليمبى ) للدرجه دى .

هكتفى بالكلميتن دول لحين استيعاب الموقف

اما الخبر التانى بقى ......... نسيته بصراحه من الخبر الاول

16 سيأتى يوماً.......!

حدثنى ابى يوما كنت فيه لم اتعدى العاشره .. (سوف يأتى يوماً تتمنى فيه لو انك لم تكبر ولم تمر بك السنين ..)
إبتسمت .. من المستحيل هذا .. فياليتنى أُغمض عينيا وأفتحهم أَجدُنى شابا ذو لحية وشارب وصاحب عضلات قوية ...
إبتسم ... سوف نرى ..!

إصطحبنى أخى يوماً كنت فيه لم أُكمل عامى الثالث عشرفى رحلة الى الشاطىء مع بعض اصدقاءه .. صاروا يسبحون ويلهون ويتهامسوا مع بعض الفتيات اللاتى كن فى البحر ....
هل آتى اليك ...؟
ابتسم .. لا لن تستطيع العوم .. عندا تصبح شاباً مثلى سوف تستطيع ذلك ..!
عبستُ ... ومتى سأصبح مثلك ..؟!
إبتسم ... لا تتعجل فسوف يأتى يوماً تتمنى لو انك لم تكبر ولم تمر بك السنين
إبتسمت ... من المستحيل هذا ... فيالينى أُغمض عينيا وأفتحهم أجدُنى شاباً مثلك ..
إبتسم ... كُنت أقول مثلك
لم أُبالى ............

أخبرنى صديق طفولتى بأنه سوف يذهب بصحة والده فى العيد إلى بلدته القديمة المجاورة لنا.. ليرى منزله الذى عاش فيه طفولته ..
ولما لا نذهب بمفردنا الى مكان ما ...؟
إبتسم ... يقول أبى اننا لم نكبر بعد .. وعندما نصبح كباراً سوف يتركنا نذهب الى أى مكان بمفردنا
هذا ظلم ... برأيك متى سيحدث هذا ..؟
إبتسم .. لااعلم ولكنة يقول دائماً لا تتعجل الامور .. فسوف يأتى يوماً أتمنى لو لم أكبر ولم تمر بى السنين ..!
ستغعل ذلك فعلاً...؟!
إبتسم ... من المستحيل هذا .. فياليتنى أُغمض عينيا وأفتحهم أجدنى صرت كبيراً..
إبتسمت ..

مُنذ شهر ... أجبرتنى مرآتى على ان أحلق ذقنى ... بعدما وجدتنى صرت شيخاً .. اكل الدهر عليه وشرب ...
شاهدنى إبن شقيقتى
علا صوتى... لا تلمس هذه .. انها للكبار فقط ...
ومتى سأكبر..
إبتسمت .... قريبا سوف تكبر
ابتسم... اتمنى ان اكبر سريعاً كى حتى أفعل ما تفعله
إبتسمت ..
تذكرت أبى .......... شقيقى ............ صديقى
إبتسمت ....لا تتعجل الامور فسوف يأتى يوماً ... تتمنى فيه لو انك لم تكبر ولم تمر بك السنين ....!!!!

3 انا موجود

انا لسه عايش على فكره ولسه عندى كلام كتير نفسى اقوله بس يمكن الظروف اللى حواليا مش مظبطه اوى

3 يووووووم الزمالك




اخيييرا وبعد عناء .. الزمالك بقى له مجلس اداره منتخب من اكبر حضور لجمعية عمومية لنادى فى منطقة الشرق الاوسط .

انا بصراحه فرحان ويمكن فرحتى مش علشان القايمة اللى نجحت هى القايمة اللى اتمنيت نجاحها وبس ... فرحتى اكتر كانت بالجمعية العموميه واعضاء نادى الزمالك ... فرحتى بسبب اقتناع اعضاء الزمالك وايمانهم بانهم هما اللى فى ايديهم يغيروا نادى الزمالك مش اى حد تانى .. وبانهم اثبتوا بحضورهم اد ايه نادى الزمالك عايش فى قولبهم ..... ( مش كلام انشا والله ) . والحضور حاجه والانتخابات حاجه تانيه خاااالص ... ليه بقى ؟؟؟ ... عكس التوقعات بان هيكون فى خناقات وضرب وبلطجه والانتخابات هتتزور والحوارات الفاشله دى .. شوفنا الانتخابات هادية ( هى كانت زحمه شوية ) من غير لا نرفزه ولا حد مسك فى حد ولا حد شتم حد وده اللى بياكد ان الجمعية العموميه واعضاء الزمالك خلاص عرفوا مصلحة ناديهم منين ...

بالنسبة للاستاذ ممدوح عباس انا شايف انه اكتر حد مناسب للزمالك فى الفتره دى ((( فى ناس بتقول علشان الراجل معاه فلوس وبيصرف وخلاص ))) انا بقول طبعا من الناحية المادية هو انسب شخص بس مش ده السبب الرئيسى .. انا شايف ان ممدوح عباس بصفته رجل اعمال من اشهر رجال الاعمال فى مصر وفى مجال البترول .. راجل عقله استثمارى .. يعنى بالبلدى بيعرف يجيب فلوس ... والنادى الزمالك الفتره دى محتاج اوى للجانب المادى طبعا مع حاجات تانيه كتير ... وبرضه فى نظرى الزمالك محتاج فكر عالى ... مش صوت عالى ( الكلام ليكى ياجاره )) .!!! وبرنامجه الانتخابى مع انى بكره الكلمه دى اوى .... ( طبعا عارفين ليه ) ماعلينا ..... الراجل مش سايب سلبيه الا ومتكلم فيها وحاططلها حل او فكره تؤدى لحل .. من الاخر يعنى انا شخصيا كنت بتمنى نجاح ممدوح عباس وقايمته كامله .. وده مش معناه انى ضد المستشار مرتضى منصور او الدكتور كمال درويش بس المستشار مرتضى منصور بشوف انه بيهاجم منافسينه وتحديدا ممدوح عباس اكتر ما بيتكلم عن حلوله وبرنامجه لو اصبح رئيس الزمالك .. وده طبعا لايصلح اطلاقا خصوصا فى الفتره دى والدكتور كمال درويش اعتقد يعنى خلاص بقى يادكتور يعنى كفاية ( انا بحترمه جدا على فكره )


فى نهاية كلامى انا بقترح على اعضاء الزمالك وجماهيره انهم كل يوم 29 مايو من كل سنه يحتفلوا بناديهم ونسيمه يوم الزمالك .... علشان يكون تذكره للجمعيه العموميه بدورها وقدرتها على التغيير ويكون يوم لجماهير الزمالك علشان تفتخر بناديها وانه صاحب اكبر تجربة ديموقراطيه حقيقيه فى مصر .

بس خلاص

2 مش عارف


فى البداية عاوز اسجل تعازيا لاسرة محمد بقولهم البقاء لله وطبعا انا زى اى انسان بزعل لما بشوف حالة وفاة وبزعل وبتاثر اوى بمشاهد الانكسار اللى بيمر بيها اهل المتوفى . لكن اللى مش راضى عنه هو كل اللى حصل او كل اللى صاحب موضوع الوفاة بصراحه مش عارف اسميه ايه .هل هو نفاق من الاعلام (كله ) ولا مش الاعلام بس من اجهزة الدوله كلها ولا هو فعلا الناس دى شايفه ان محمد (الله يرحمه ) كان شخصية تاريخيه او مقاتل مات فى ساحة القتال مدافع عن شرف الامه . او ممكن يكون مقاتل فى ساحة الدفاع عن كرامة المصريين او مناضل ضد الفاساد والمفسدين ..... والله انا مش عارف ليه جميع القنوات عملت حداد وفضلت طول اليوم قران وادعية (دى حاجه جميله طبعا وياريت كل فتره يعملوا كدا ) لكن ميتعملش كدا على طفل صغير لم نعهده بطلا ولا قائدا ولا عالما ولا اى حاجه علشان يتعملوا جنازه عسكرية وووو .....
طيب فين الوف الاطفال اللى بتموت يوميا من الامراض اللى اقل من اللى مات بيها وفين الو المصريين اللى بيموتوا يوميا على الطرق وفى العبارات و على شواطىء ايطاليا واليونان ...... لو هتتحسب صح هنعتبر ان مصر هتكون فى حداد طول عمرها .....

فى اليوم ده اعتبرت مصر بقت ظام ملكى ملكى يعنى .. وخلاص كدا ظهرت اوى ان الريس الجاى هو البشمهندس جمال ... شئنا ام ابينا ...

يلا يلا كله محصل بعضه

1 مواقف

من اصعب الحاجات اللى بتمر على الانسان ى اذا كان انسان ناجح صاحب فكر وقلم حر همه الاكبر هو وطنه وازاى يشوفه فى المكانه اللى يستحقها ومع ذلك وطنه بيكون اكبر المعادييين ليه وما اكثر الامثله والنماذج فى الوطن العربى كله . ومن الامثله والنماذج دى الاستاذ حمدى قنديل الراجل اللى أكن له فى قلبى كل حب واحترام وتقدير صاحب القلم الرصاص اللى بيرعب بيه كل خائن ومتآمر على وطنه صاحب الكلمه اللى توجع ( أمة مهند ). انا جبت انهارده فيديو يمكن يكون متاخر شوية انى اجيبه بس بجد كلماته ودموع منى الشاذلى وسط الحديث اجبرتنى انى ادور عليه ويكون موجود فى المدونه هنا





ولو عاوز عبر عن موقفى من موضوع حزب الله والحمله اللى متشملله الحكومه المصرية اوى وعاملاها معاه ( ماهو احنا مش بنعمل رجاله الا لما الموضوع بيبقى مع طرف عربى او جماعه مش على هوانا ) المهم رايى فى الحوار ده متفق تماما مع كلام الاستاذ حمدين صباحى فى الحوار ده .





3 الماتش هيبدا كمان ساعه


الماتش هيبدا كمان ساعة تقريبا .. مش عارف ليه مش المره دى عندى لامبالاه يعنى مش حاسس بالشد اللى بيجيلى كل مره قبل ماتش زمالك واهلى ... هو يمكن علشان اخدت ان الفتره دى مفيش امل ان الزمالك يفوز على الاهلى .... او لان الماتش جاى فى وقت انا عندى اللى يكفينى ومفيش مكان فى دماغى فاضى علشان افكر واتشد للماتش .. او يمكن خير اللهم اجعله خير عندى احساس ان الزمالك هيفوز اخيرا ...... مش عارف بس قولت اسجل شوية الكلام اللى خطروا على بالى دلوقتى ..... بتمنى الزمالك يفوز (بعد اذن اخواننا الاهلوية طبعا ) ... يعنى نفوز ماتش بقى كفاية _ هو كله فوز فوز مفيش هزيمة ولا ايه ..._ يلا يامسهل ... نلتقى بعد الماتش

3 الى مدونتى

مدونتى الحبيبه
اعلم انه قد شغلتنى الحياه عنكى لبعض الوقت .... بعض الايام او ربما عشرات الايام ... ولكنى لن انساكى ابدا . فمازلت ارى فيكى نفسى واشعر اثناء تواجدى وتجولى بين سطورك اننى احيا .....
لا تغضبى منى .. او تشكى لاحد عدم تواجدى باستمرار .... واعدكى باننى سوف اواظب على الدخول ..
اراكى قريبا ان شاء الله .

7 إلى إنسانه


هذه احدى كتاباتى او محتويات احدى صفحات ( الاجنده ) الخاصه بيى والتى تعد بمثابة المنقذ لى دائما اذا ما تزاحمت الافكار فى مخيلتى او ذاكرتى . كنت قد نويت ان تخرج هذه الكلمات خارج حدود الاجنده وتنشر فى المدونه وهذه الكلمات تحديدا وذلك لانها قد كتبت فى وقت ملا قلبى بسيل من دموع الاشتياق او الافتقاد لشىء ما ... وفى حالتى وفى هذه الايام تحديدا ولانى خارج حدود الوطن ولاحساسى الذى انتابنى لبعض الشىء من ذلك بانى تائه يكون من الممكن ان افتقادى هو للوطن بكل مشاكله وهمومه وافراحه ولاصدقائى .. ولعائلتى .. وخصوصياتى او لشعورى بالغربه .... او .....او ,.
استطيع ان اقول ان ما اشعر به اثناء كتابتى لهذه الكلمات هو مزيج بكل المشاعر .... ولكن ماجعلنى اصر على نشر هذه الكلمات هو احساسى التام بانى افتقد وبشده لانسانه قد جعلتنى ارى الحياه بعين المحب الذى يرى انه بالامكان ان احيا من جديد وان للدنيا وجه اخر ملامحه تشع بالنور والامل . انسانه ارى ان بدونها لا استحق العيش او الوجود . ...أشهد انها هى من اعاد بنائى ... من رصع شخصيتى بالاحجار الكريمه والاحجار هذه هى رقتها وعذوبتها وحسها العالى الرفيع .
ان قلمى وان تركته يكتب بمفرده عنها ... اقسم انه لن يكل ولا يمل من الكتابه عنها وعن ما فعتله بى ...
كلماتى هذه هى نقطه فى بحر من اصدق المشاعر الذى امتلا من فيض ماتركته فى هذه الانسانه ..
اعلم انها ستقرا هذه الكلمات وكنت اتمنى ان تطول كلماتى حتى اعبر جيدا عن جزء مما ادخره لها فى قلبى وهذا من المستحيل قطعا. لانه لايوجد من الكلمات مايوفى ذلك ... ولكنى اقول لها.... حفظكى الله لى .. وإنى أًحِبُكِ

3 دنيتــــــى.........حِلم!



رغم ان الحمد لله ما بقتش بغيب عن المدونه بس حاسس فعلااااااا ان المدونه وحشاااااااااااااااااااااااااانى جدا جدا .. لدرجه ان كل ما ادخل المدونه افضل اقرا المواضيع اللى فيها تااااااانى بجد حاسس انى بقالى كتييير اوى ما فتحتهااش ولا شوفتها يعنى غربه شديده ..سيبونى بقى اقولها وحشاانى اوى يا مدونتى..احساسي ان هى شخص وعزيز عليا اوى ونفسي اقدمله هديه؛ شخصيا مش عارف الاحساس دا من ايه ياريت انتوا لو حد عارف يقوللى او لو حد عنده وجهه نظر يعرفنى ؛انا عارف ان هو طلب مش مظبووط بس اوقات كتيير اوى بتحصل ان الواحد ما يكونش فاهم حاجه معينه في نفسه واللى حواليه هما اللى فاهمين او عندهم خلفيه عن حالته ......اعتبرونى حاله وفكروا لها فى حل.........





شكل البطريق اللى انتوا شفتووه دا انا دخلت على الموقع ومن غير ما اشعر لقتنى كتبت اسم مدونتى (دنيتـــــــــــــى.....حِلم).!!

انا عااااااااارف والله انى مقصر اوى اوى في حق المدونه وفي حقكم انتم كمان بس فعلا غصب عنى لانى بجد في ظرف طارق لان كان فى موضوع سفر وكدا وفجأة لقتهم بيقولولى ان السفر اتحدد.......
مش عارف اقول ايه و لا اعمل ايه بس حقكم عليا و اسمحولى التمس العذر عندكم وادعولى بالتوفيق والتيسير , بس ان شاء الله برضه هفضل اكتب فى المدونه ومش هغيب في الكتابه عنها بعد كدا......انا بسلم عليكم و على المدونه (دنيتى.........حلم) وبرضه انا عند وعدى وان شاء الله مش هغيب في الكتابه فيها تانى
ودعواتكم معايا بقى

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .