3 يووووووم الزمالك




اخيييرا وبعد عناء .. الزمالك بقى له مجلس اداره منتخب من اكبر حضور لجمعية عمومية لنادى فى منطقة الشرق الاوسط .

انا بصراحه فرحان ويمكن فرحتى مش علشان القايمة اللى نجحت هى القايمة اللى اتمنيت نجاحها وبس ... فرحتى اكتر كانت بالجمعية العموميه واعضاء نادى الزمالك ... فرحتى بسبب اقتناع اعضاء الزمالك وايمانهم بانهم هما اللى فى ايديهم يغيروا نادى الزمالك مش اى حد تانى .. وبانهم اثبتوا بحضورهم اد ايه نادى الزمالك عايش فى قولبهم ..... ( مش كلام انشا والله ) . والحضور حاجه والانتخابات حاجه تانيه خاااالص ... ليه بقى ؟؟؟ ... عكس التوقعات بان هيكون فى خناقات وضرب وبلطجه والانتخابات هتتزور والحوارات الفاشله دى .. شوفنا الانتخابات هادية ( هى كانت زحمه شوية ) من غير لا نرفزه ولا حد مسك فى حد ولا حد شتم حد وده اللى بياكد ان الجمعية العموميه واعضاء الزمالك خلاص عرفوا مصلحة ناديهم منين ...

بالنسبة للاستاذ ممدوح عباس انا شايف انه اكتر حد مناسب للزمالك فى الفتره دى ((( فى ناس بتقول علشان الراجل معاه فلوس وبيصرف وخلاص ))) انا بقول طبعا من الناحية المادية هو انسب شخص بس مش ده السبب الرئيسى .. انا شايف ان ممدوح عباس بصفته رجل اعمال من اشهر رجال الاعمال فى مصر وفى مجال البترول .. راجل عقله استثمارى .. يعنى بالبلدى بيعرف يجيب فلوس ... والنادى الزمالك الفتره دى محتاج اوى للجانب المادى طبعا مع حاجات تانيه كتير ... وبرضه فى نظرى الزمالك محتاج فكر عالى ... مش صوت عالى ( الكلام ليكى ياجاره )) .!!! وبرنامجه الانتخابى مع انى بكره الكلمه دى اوى .... ( طبعا عارفين ليه ) ماعلينا ..... الراجل مش سايب سلبيه الا ومتكلم فيها وحاططلها حل او فكره تؤدى لحل .. من الاخر يعنى انا شخصيا كنت بتمنى نجاح ممدوح عباس وقايمته كامله .. وده مش معناه انى ضد المستشار مرتضى منصور او الدكتور كمال درويش بس المستشار مرتضى منصور بشوف انه بيهاجم منافسينه وتحديدا ممدوح عباس اكتر ما بيتكلم عن حلوله وبرنامجه لو اصبح رئيس الزمالك .. وده طبعا لايصلح اطلاقا خصوصا فى الفتره دى والدكتور كمال درويش اعتقد يعنى خلاص بقى يادكتور يعنى كفاية ( انا بحترمه جدا على فكره )


فى نهاية كلامى انا بقترح على اعضاء الزمالك وجماهيره انهم كل يوم 29 مايو من كل سنه يحتفلوا بناديهم ونسيمه يوم الزمالك .... علشان يكون تذكره للجمعيه العموميه بدورها وقدرتها على التغيير ويكون يوم لجماهير الزمالك علشان تفتخر بناديها وانه صاحب اكبر تجربة ديموقراطيه حقيقيه فى مصر .

بس خلاص

3 اللى شرفونا بتعليقهم:

غير معرف يقول...

انا معاك فى ناه يوم للزمالك بس انا كنت من انصار مرتضى منصور .. يعنى بيدافع بقوة عن حقوق النادى بس احسن حاجه ان حازم امام فى المجلس

غير معرف يقول...

ياعم منصور مين هو النادى ناقص مشاكل .. على فكره زمايلى الاهلاوية كانوا عاوزين مرتضى علشان يخرب النادى

قلبى الصغير يقول...

لا مرتضى ولا عباس واساسا الزمالك فى نهاية ايامة وهيبقى زى الترسانة وافكركم

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .