9 القــــــــــــــــذافـــــــــــــــــــــى







مين اللى شاف خطاب الرئيس الليبى معمر القذافى فى الامم المتحده انهارده؟



هو اساسا لسه خالص حالا .. كنت ماسك الريموت وعمال بقلب فى القنوات ... لقيت الرئيس الليبى بيقول كلمته .. انا كنت اتفرجت شوية على خطاب اوباما ولقيته كلام مكرر وسمعته قبل كدا فقمت .....


انما بقى الرئيس الليبى معمر القذافى ... بصراحه والله قال شوية كلام زى الفل ... الخطاب طبعااااااااااا تعدى الوقت المسموح بيه واللى كان المفروض ربع ساعه ......... دا قعد اكتر من ساعه .ولما طلب منه الاختصار، رفض القذافي الامتثال متحججا بان اوباما هو ايضا تجاوز الوقت اوباما قعد اربعين دقيقه


اول اللى لفت انتباهى الورق الكتييييير الاصفر اللى كان موجود ادامه ( فكرنى لما كنت باجى اذاكر فى ماده ومش فاهم فيها حاجه )

يمكن انا مسمعتش الخطاب من اوله لكن لحقت جزء كبير منه

ملخص كلامه .. هوبيطالب باعادة تنظيم وهيكلة الامم المتحده ( من اول وجديد يعنى ) كليا .. واعادة النظر فى اهدافها وازاى تبقى موجوده ويحصل كل الخراب والحروب اللى بتحصل دى وطبعا برئاسة الدول الكبرى
لحقتة وهو بيتكلم عن مقر الامم المتحده ... قال انه بيطالب بنقل مقر الام المتحده من نيويورك وقال بما ان امريكا دوله مستهدفه من الارهابيين ومبنى الامم المتحده كمان مستهدف .. طيب ليه ما ننقلش المقر ده لاى مكان تانى مش مستهدف وبرر كدا بان كل الوفود المشاركه اتعرضت لاجراءات بايخه فى السفر .. واثناء وصولهم لامريكا ... وقال ليه يعنى نطير 14 ساعه ؟

واقترح نقل المقر فى فيينا او مدينة سيرت الليبيه ...

* كان من وقت للتانى بيتنرفز ويخبط المنصه اللى قدامه بقوة ...

قال كمان انه بطالب بان يكون مجلس الامن مجرد اداه لتطبيق قرارات الامم المتحده اللى هتكون خارجه من الامم المتحده بالاغلبيه ومش بطريقة الخمس اعضاء الدائمين اللى فى مجلس الامن ...

قال احنا مش حوانات عايشين فى زريبة ..... وكررها كام مره

طالب الامم المتحده تحقق فى كل الحروب والمجازر والاغتيالات اللى وقعت بعد قيام الامم المتحده ... وشكك فى قدرة الامم المتحده ...

طالب بالتحقيق فى العدوان الثلاثى على مصر وازاى تقوم دولتين عضوتين فى الامم المتحده بالهجوم على مصر لمجرد انها مارست حقها واممت قناة السويس اللى موجوده فى ارضها... ( عجبنى اوى هنا )

والتحقيق فى الحرب على يوغسلافيا ... والحرب على العراق .. وعلى افغانستان ... وفيتنام

وطالب بالتحقيق فى الحروب دى ومحاكمة المتسببين علشان يبقى فى مصداقية للامم المتحده وعلشان يضمن ان حاجه زى دى متتكررش تانى ... وقال تانى ( احنا مش حيوانات )

وطالب بالتحقيق فى مجازر صبرا وشاتيلا ... وغزة وقال لازم المجرمين يتحاسبوا .. لانهم معروفين وقال ليه مش بيتحولوا لمحكمة الجنايات الدوليه ... وسال هى موجوده علشان البشير وعلشان رئيس يوغسلافيا وعلشان الدول الفقيره بس ؟؟ وقال لو هى كدا يبقى مش هنعترف بيها .. لازم الكل يخضعوا لمحكمة الجنايات الدوليه ..

اتهم امريكا والدول الكبرى بدخول الامم المتحده فى قضية الحريرى ... وسال هى لبنان معندهاش شرطة وقضاء علشان تحل القضية ..؟؟ وقال ان التدخل ده كان سببه معاقبة سوريا فى الاساس ..

.. جه موضوع فلسطين بقى ... وقال ان الحل الوحيد هو دولة واحده يعيش فيها اليهود والفلسطينين يهود ومسلمين ومسيحين ويرجع كل اللاجئين الفلسطينين ارضهم وتكون دوله واحده واكد صعوبة حل دولتين لان مفيش حدود ممكن تفصل دولتين هما اصلا داخلين فى بعض

.......... وراح مطلع كتاب ابيض كدا وقال دا فى وجهة نظرى وفيه الحل ,, وراح متدير ورامى الكتاب فوق على المنصه ... بنرفزه ............ القاعه كلها ضحكت على الموقف
فى الوقت دا بقى راح ساكت شوية واتكلم بصوت عالى وبسرعه .... انتم اللى بتكرهوا اليهود ( الاوربيين يعنى ) انتوا اللى حرقتوهم وانتم اللى طردتوهم ........ احنا عمرنا ماكرهنا اليهود ...... احنا ابناء عمومه ..... واحنا اللى اويناهم من الرومان ...... العرب اللى احتضنوهم .... وهييجى اليوم اللى هيحتاج فيه اليهود للعرب.



..... نسيت فى موضوع الاغتيالات .. طالب بالتحقيق فى مقتل الرئيس الامريكى كيندى .. وقال اننا عرفنا ان سبب قتله هو لانه كان ناوى يفتش مفاعل ديمونة الاسرائيلى ...

بس بجد كان خطاب جامد وكانت اراءه بسيطه بيفكر فيها المواطن العادى وخصوصا موضوع العداله اللى بيطالب بيه فى الامم المتحده وان حق الفيتو يبقى موجود مع جميع الاعضاء ... وان المحكمة الدوليه لازم يخضع ليها كل مدان ..


دى كانت لمحة كدا على مجمل الخطاب بتاع الرئيس الليبى معمر القذافى ... احييه عليه بصراحه



9 اللى شرفونا بتعليقهم:

ضكتور جدا يقول...

والله راجل عسل
......................
قال انه بيطالب بنقل مقر الام المتحده من نيويورك وقال بمان ان امريكا دوله مستهدفه من الارهابيين ومبنى الامم المتحده كمان مستهدف
...............................
ههههههههههههه
دماغه عالية قوي

حمدى جعوان يقول...

ضكتور جدا
__________

بامانه كان مزاجه عالى انهارده.. والله وكان فى حلول بسيطه لمشاكل كبيره

تحياتى ليك

jafra يقول...

مسا الخير
انا شفت الخطاب من اوله معقول بابا يفوت خطاب :)) عادات انت عارفها
المهم
الخطاب كتيييير ممتع و قال في اشيا جامدة اوي اوي اوي ( بعرف احكي مصري)

على راي مدون كلو حشيش
يعني بانجو ببانجو
حتى العالم كانوا بضحكوا كانهم مو مصدقين انو حدا يحكي هيك
بس على الاق حكي شي مفيد مو زي غيروا
فشة خلق يعني
\


تحية

اقصوصه يقول...

اممم

انا بصراحه سمعت عن الخطاب

وانه عمل ضجه

بس ما سمعته شخصيا

بس شكله كان خطاب حلو :)

حمدى جعوان يقول...

جفرا
__________
بتعرفى تحكى زى المصريين فعلا
بس كنتى قولى بقى . بعرف اتكلم زى المصريين (:

تحياتى ليكى وعجبنى اوى البوست الاخير فى مدونتك



اقصوصه
__________

فاااااااتك الخطاب ... دور عليه بقى .. بجد كان خطاب مميز

شرفتنى بوجودك

مواطن شووجااع يقول...

والله الراجل دي بيقول كلام زي الفل
يارييييييييييييت كل لرؤساء العرب يبقي دماغهم لاسعة زيه كدا

والله بيعمل حاجات وبيقول حاجات بتعبر عننا إحنا كمواطنين

المعلم برعى صاحب القهوة يقول...

انت عارف القذافى ده هو اللى قالت فيه ذكرى رحمة الله عليها
....
......
.......

ما كتير الحق بيسطع ويقولوا عليه جنون

اهو ده القذافى بالظبط متزن احيانا ضارب احيانا اخرى

حمدى جعوان يقول...

مواطن شوووجاع
__________
ياريت والله ودى حاجه كلنا بنتمناها وبالاضافه لكدا ياريت بقى الافعال يعنى ميبقاش كلام وخلاص لان الفعل اهم فى الوقت ده
شكرا شكرا ليك


المعلم برعى
__________

والله يامعلم انت جبت المفيد
نورتنى بمرورك والله

العيسوى الصغير يقول...

يعنى الامم المتحدة هتسمع كلامه يعنى ما يقول اللى يقوله

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .