4 بين نعم ولا ......

السلام عليكم ورحمة الله بوركاته

وبدأناها بتحية الاسلام علشان محدش يقول حاجه ولا حاجه اصل انا بعيد عنكم واحد من اللى كانوا بيأيدوا لفكرة (
لا) للتعديلات الدستورية .. واللى اتضح اننا وللاسف اصبحنا قلة مندسه ضد الاسلام ومع الملحدين اصحاب تاشيرات كندا وامريكا

فى البداية انا مازلت عند تفاؤلى ودا لان   اصحاب نعم بدأوا كمان يقولوا ان اصحاب لا ناس متشائمين وبتاع .. الموضوع بإختصار وبرغم نجاح المصريين فى اول اختبار ديموقراطى بعد الثوره الا ان الاستفتاء وضح شوية امور منمها ان الشعب المصرى معندوش ثقافة الديموقراطيه بمعنى تانى ويؤسفنى انى استعير كلمة الريئس المخلوع هو ان الشعب غير مؤهل لممارسة الديموقراطيه وده نتيجة طبيعيه لسياسة التهميش اللى عيشنا فيها نظام عصابة مبارك واعوانه .. احنا رائعين فى ممارسة الاحتشاد (
اللمه بمعنى ادق) وده شوفناه فى ميادين مصر وشوفناه فى الاستفتاء والطوابير اللى ملهاش اخر ... دى حاجه لازم نعترف بيها ولازم اعلامنا يعترف بيها علشان نقدر نواجهها ونمشى فى الطريق الصح لانى لاحظت ان الاعلام بيحاول يغمى عنيه عن الحقيقه دى ولازم نعرف انه فى فرق بين الاحتشاد وبين ممارسة الديموقراطيه احنا صحيح غير مؤهلين كليا للمارسة الديموقراطيه لكن عندنا استعداد واستعداد كبير جداااااا


اللى حصل انهارده انى شوفت فيديو للشيخ ممحمد حسين يعقوب وهو واحد من الناس اللى بحترمها جدا ومكانته عالية عندى وعند كل المسلمين ولكن بصراحه اتصدمت ... استوقفتنى بعض الكلمات اللى جات فى الخطبه وهى مثلا برامجهم وجرائدهم وديموقراطيتهم وغزوة الصناديق .. والناس اختارت الدين ...!!
هو فى ايه ..؟
هو حاجه من اتنين يا اما احنا ((
معاشر من قالوا لا )) مش فاهمين يا اما هما (( معاشر من قالوا نعم )) مش فاهمين
اصل انا الى فهمته اننا الاتنين هدفنا مصلحة مصر واستقرار مصر انا شايفها انها هتيجى بدستور جديد ونبدا على مية بيضه زى ما بيقولوا ويكون فى فرصه لتوعية الناس بالديموقراطيه وتقبل الاخر وما الى ذلك علشان نبدا نبنى على قاعده سليمه ..   .. وهما شايفنها انها بتعديل مؤقت وبانتخابات مبكرة واستقرار مبكر .. دا اللى كنت فاهمه قبل الاستفتاء وطول فترة الحوار على الاستفتاء

فوجئت بان لا فى ناس بتقول انت رايح الاستفتاء تقول نعم ولا لا للدين نعم ولا لا للاسلام

بصراحه الفيديو صادم .. على الاقل بالنسبة ليا ومش عارف هو انا اللى كنت فاهمه صح ولا انا كنت فاهم غلط ولا ايه اللى بيحصل




ــــــــــــــــــــــــــــــــــــــــــ


مطلوب من المجلس الاعلى فى الفتره الجايه ومع الاعلان الدستورى لازم  يكون فى قوانين حاسمة فى مسألة خلط الدين فى السياسة بالشكل ده
مطلوب من الاعلام تثقيف الناس فى الديموقراطيه وتقبل الراى الاخر
مطلوب من كل الاحزاب وكل القوى السياسية وكل الشباب النزول للشارع وخصوصا فى المناطق الريفيه والصعيد 
مطلوب من مشايخنا وعلمائنا الاجلاء ان يفرقوا بين الاختلاف فى الراى فى السياسه وبين الخروج عن الدين  






دا الفيديو



4 اللى شرفونا بتعليقهم:

daloo3a يقول...

ان شاء الله خير

والله يوفق

و الله يعيين و يستر من اللي راح يصير

Unknown يقول...

السلام عليكم ورحمة الله وبركاته
نغمة من قال( نعم) ومن قال( لا) ضدان نغمة نشاز لامحل لها من الإعراب..
الكل مصرى وطنى مخلص له رؤية خاصة وفى النهاية الهدف واحد ..مصر

حمدى جعوان يقول...

دلوعة
ــــــــ

ان شاء الله الجاى خير
شرفتينى بتعليقك


استاذ محمد
ـــــــــ
وعليكم السلام ورحمة الله وبركاته
متفق معاك تماما كلنا هدفنا مصلحة مصر
والله الموفق ان شاء الله

هنعيشها صح يقول...

حمدى ...ازيك يا فنان

شو اخبارك ؟!

انا قولت لاء واتقال عليا ليبرالية علمانية موزابيقيةملحدة ههههههههههههههه

بجد الواحد لما اتناقش فى التعديلات شاف العجب وقلة مندسة وحاجات كدا غريبة

بس برغم كل دا الموضوع كان جميل وكان فى ايجابية
بس المشكلة ان كان فيه مظهر غير عادى باستخدام الدين والواجب الشرعى وكدا واهل الحق واهل الباطل وللحظ الرائع يوم الجمعة اللى قبل السبت بتاع الاستفتاء ماشاء الله يعنى المساجد جنبنا كلها قولوا نعم ...وماشاء الله شيخ وهو اللى بيقول كدا وبالتالى الناس كلها قالت ان كلامه صح وفرض الرأى والرأى التانى اللى هو لاء باطل ..دا غاظنى جدا

بس بجد عادى ان شاء الله اللى جاى احسن

بس بالنسبة للفيديو بتاع شيخنا يعقوب فتم تصحيح الخطأ باعتراف الشيخ المقدم بان الشيخ يعقوب اخطأ ...كل انسان خطاء

ربنا يستر على مصر بقى


ومنور دايما يا باشا

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .