بمناسبة ذكرى الهزيمة والنصر ( 5 يونيه - 10 رمضان)
في يوم من أيام سنة 2008... كنت رايح الشغل الصبح وأثناء سيري في الشارع لمحت كتاب مرمي على أطراف كومة (زباله ) وباين انه الى حد ما مش متبهدل .. حاولت ادقق في اسمه بنظرات عابره بس مركزه ( علشان محدش يقول بيبحلق ف الزباله يعني ) المهم لمحت اسم الكتاب كان اسمه من وراء الغيم
طبعا كان نفسي امد ايدي واخده بس واضح ان نظراتي خلت ست قاعده قدام بيتها تتابعني فا اتكسفت اخده ومشيت .. كملت طريقي للشغل
في فترة العصر وانا مروح مشيت من نفس الطريق والمره دي كنت مصمم اخد الكتاب ولحسن حظي ( او لاني كنت متأكد اني هلاقيه علشان عارف ان الزباله مش هتتشال وكمان عارف ان مفيش حد هياخد الكتاب يقرأه ) لقيت الكتاب مكانه .. مديت ايدي واخدته الكتاب اسمه من وراء الغيم ليوسف السباعي .. الغلاف متبهدل شوية لكن الكتاب صفحاته سليمه
بصيت عليه نظره سريعه وانا ماشي .. كنت مفكره روايه
المهم لما روحت البيت فتحته وقرأت فيه شويه .. الكتاب مطبوع تقريبا سنه 69 او 70
- فاكر انه كان بعد النكسه وقبل اكتوبر واتضح انه مقالات او تحليل سياسي واجتماعي ونفسي للشعب المصري
والمواطن العربي .في فترة مابعد النكسه ... الحقيقة مقرأتش الكتاب كله
.. قرأت أجزاء منه ... بس الأجزاء دي كانت كفيله تعيشني أجواء مش عارف ومش قادر اتخيل الناس في الفتره دي كانت عايشاها ازاى
احساس بالذل والانكسار .. الإحساس بالمهانة والضياع .. حالة فقدان الوعي فقدان الامل فقدان اي حاجه تخليك تعيش لبكره خصوصا لما تكون حاطط امل كبير ف قيادتك و تخزلك
بس حتى بعد نكسة 67 ومع الوقت الناس كان هدفها واحد ( هنحارب ) قرأت الأجزاء دي وبس لكن محتواه مفارقش خيالي الى الآن ....
مع الوقت ..لقيت احساس النكسه وبرغم اني معيشتوش إلا من خلال القراءة والمشاهده ممتد معانا و ما انتهاش بنصر اكتوبر.. . الإحساس دا مخليني متأكد ومتيقن ان النكسه مش بس عدو احتل ارضك .. ولا هزيمة لجيشك ف معركة..
النكسه حاجات كتييير منها مثلا لما تبني امال كتيييره على حدث معين اوشخص وفجأه أحلامك كلها تتحول لكوابيس زي ما حصل بعد الثوره .. انك تعيش ف وطن بصوت واحد .. حتى لو طلعت اصوات تانيه فهي يا هتخونك وياهتكفرك وياهتقول عليك ارهابي
ويوم ما هتلاقي اصوات بتتكلم بعقلك وقلبك .. فهيختلفوا مين فيهم يتكلم بالنيابه عنك ..
النكسه احساس بالضلمه وانت ماشي في عز الضهر .. في وشوش بتتغير على حكمك ومع ذلك نفس السياسات بتفضل حاكماك .. في صوت المفروض انه صوتك وهو ابعد ما يكون عن ذلك..
أو انك مش عارف تلاقي ف وطنك أبسط حقوق ممكن تكون عند أي انسان .. العدل الكرامه عدم التمييز (زي ما اتقال في فيلم فبراير الاسود .. لازم تبقى مواطن وحاجه )
لما تشوف وطنك بطريقه غير مقصوده من خلال اعلانات رمضان ... فلل وقصور وقرى سياحيه .. وعشش صفيح وميه ملوثه ومستشفيات وجوع
النكسه في رأيي هو كل حاجه عايشينها حاليا .. سياسه اقتصاد تعليم اخلاق في الحضيض كوكتيل وبيتجلى اكتر ( كل رمضان )
النكسه لما نبقى ف نفق .. ومفيييش اي نقطة ضوء قدامك .. ولا وراك ومش عارف اذا كنت رايح ولا جاي
فأنا يؤسفني ياجماعه ابشركم اننا غارقين في النكسه حتى ذيلنا
.......................................................................................
نقلع بقى النضاره السوده ونسمع الاغنية دي
الاغية لو عدد مشاهداتها مليون .. فانا لوحدي شايفها مليون الا ربع
الثلاثاء, يونيو 06, 2017
حمدى جعوان
