9 رحله سعيده

مساء الخير عليكم جميعااااااااا

كنت مسافر انهارده بخلص ورقتين كده " وما ادراكم بتخليص الورق فى مصر " بس غالبا يعنى مش هتكلم فى المعاناه دى لانى قررت اتكلم عن رحلتى السعيده .. هتكلم عن تفاصيل شوية فى الرحله وطبعا بقول رحله وانتوا ادرى بقى .....
كعادة مشواوير تخليص الورق... ظبط منبه.... ونوم كله قلق... احيانا بتوصل لكوابيس واحلام غريبه " وكالعاده برضه المنبه يرن وافصله وانام تانى
" ماعلينا..

نزلت من البيت ورايح مشوارى واول حاجه هنشوفها طبعا الميكروباص ... وناس كتير وزحمة " مش عارف الناس دى صاحيه بدرى ليه " بعد معاناه بسيطه لقيت مكان فى نص العربيه وانا بقى بكره المكان دى جدا وده لانى زى ماحضراتكم عارفين "عقدتى الحساب " والمكان ده اللى بيقعد فيه لازم يلم الاجره ييييييييييييي .

يللا ماعلينا .. امرنا لله

رحلتى غير كل الرحلات .... مكنتش اعرف انى هركب عربيه شامله كل اطياف الشعب المصرى ... كل انتماءاته ... قواه السياسيه " اذا كان فى قوى سياسيه اصلا " ... يعنى من الاخر العربيه كانت عباره عن إئتلاف من الشارع المصرى ... " بس كان ناقص رقاصه "..
واكتشفت الحوار ده من اول الطريق تقريبا ... اللى حصل بداية من سواق الميكروباص ...
كل ما اركب مع سواق يبينلك ان سواقين الدنيا كلهم مابيفهموش حاجه فى السواقه وان مفيش سواق فى الدنيا غيره هو ..... هو البريمو .... هو اللى محصلش .. وده طبعا من اول الطريق.. ويمكن سكت وبطل يتكلم عن بطولاته " السواقيه " لما كان هيخبط واحد كان واقف على الرصيف ومش عارف ازاى صراحه ..

ماعلينا

نيجى بقى للبنتين اللى كانوا قاعدين جنب السواق .... يا ســــــــــاتر
فيهم واحده من اول الطريق بتحكى فى حاجه واحده وصوت عالى .................
...ازاى هى بتاخد حقها فى الكليه من الولاد....
وازاى الولاد هيموتوا عليها وهى مش معبراهم... وازاى الدكاتره بيترجوها تحضر محضراتهم ... وهى منفضه "

معندهاش وقت " وده طبعا كله بصوت عالى وبدون فواصل .. وطبعا بتحكى لصاحبتها اللى جنبها واللى كان

السواق حاجزلهم المكان ده جنبه ومش راضى يركب حد غير لما جم ..

يلا ماعلينا

صاحبتها بقى .... هـــــــــــــــــبـــــــــــلــــــــــه.......
هبله بكل معنى الكلمه........ عماله تبص لنفسها فى المرايه تاعة السواق .. وتبرق لنفسها بطريقه غرييبه ... وتتكلم شوية مع صاحبتها وتبص تانى فى المرايه ... وانا قاعد اتفرج وســـــــــــــــــاكت ..

من بقى جنبى .... الشيخ ... الراجل الصالح ابو سبحه ودقن بيضه وشال ......... كل شوية .
- يارب لك الحمد . استغفر الله العظيم
اخيرا حد عاقل فى العربيه دى ...

على شمالى بقى واحد مطلع راسه بره العربيه .... علشان عاوز هوا واللى وراه مش عاوز هوا ... ففتح الشباك على اد

دماغه وطلع دماغه بره علشان الهوا ... والاخ اللى وراه من عاوز هوا ليه بقى ..

علشان بيطير الجورنال اللى فى ايديه ... هو كان عمال يقول المصر اليوم .. المصرى اليوم.... واكتشفت وانا نازل انه ماسك الجمهوريه ..

ماعلينا

قدامى بقى كان راكب الاخوات .... اتنين منقبين .... واحده ماسكه الموبايل وكل اللى بتقوله ..

- انتى مابتفتحيش عليا ليه ..؟ نفسى اعرف لما برن عليكى ما بتفتحيش ليه ..؟ هااا ... بتقولى ايه مش سمعاكى .... طيب

مش بتفتحى عليا ليييه..؟؟؟

ماعلينا

الكرسى الاخير بقى ... واحد جنب الشباك ... ده بقى المطرب الشعبى ... طول الطريق كالاتى

- أبص لروحى فجأه لقيتنى........ " ويسكت " ... ويروح باصص من الشباك و . إتفوووووو ..
- أبص لروحى فجأه لقيتنى........ " ويسكت " ... ويروح باصص من الشباك و . إتفوووووو
طــــــــــــــــــــــــول الطريق على كده

الشيخ اللى جنبى بقى لقيته فجأه جايله تليفون ...... وفجأه الايمان اللى كان مسيطر على كلامه.. اتقلب وبقى عاصفه من الغضب على المتصل بيه .... وكم شتايم لاحصر له ........... شوية غضب عـــــــــــــجــــــــــــــــب عــــــــــــــــجــــــــــــــب .
- وقف وقف يا اسطى نزلنى هنا ... " الشيخ نزل وشكله هيرتكب جريمه ".

السواق نزله وجه ماشى .. لقى بنت

- لو سمحت ... خدنى معاك قدام شويه .
- تعالى .. فى مكان فاضى اهو .
البنت دى بقى ياجماعه ... ناقصلها حاجه واحده ... فستان ابيض .. وتبقى عروسه رسمى .. وعريس بالمره .... ميك اب كامل ومفيهوش غلطه ... " انا بصراحه مبحبش ابص بس بصراحه لقيتنى ببصلها .." من باب العلم بالشىء " وبس ديرت وشى .
وبعدين السواق جاى يمشى بعد البنت ماركبت .... الزحمه وقفته شويه ... واحد معدى جنب العربيه ..

- ايوا عجميه قرص..... قرص ... قرص .. " الصاج مكشوف والدبان عامل احتفال عليه ".... لقينا البنت بنت الناس اللى ركبت بتقوله معاك بعجوه........!!!!!!!!!!
-ايوا معايا .....
- بكام ؟
- الاتنين بجنيه ونص
- لا الواحده بنص بس .....................!!!!!!!!
الموقف ده كان صدمه ليا بصراحه ........ " كانت نقصاكى ياختى" ولقيتنى ببصلها تانى بس المره دى " من شباك الجهل بالشىء "

فضل الحال على كده طول الطريق.

- السواق ده غشيم ... كان المفروض ياخد الملف على الضيق علشان الطريق مش مساعده .... سواقين اخر زمن .

- بس وعارفه بقى قولتله ايه ....؟ قولتله يا محمود انت لو عاوز تكلمنى بجد ... سيبك من الشله اللى ماشى معاها لان

فى اتنين منهم عاوزين يكلمونى وانا منفضالهم .

- ابص لروحى فجأه لقيتنى ... اتفوووو.

- يااستاذ اقفل الشباك .... مش عارف اقرا..

- هى القرص دى من غير سمسم ليه ....!!

وانا مكتفى بالمشاهده ....... والتعليق بين وقت والتانى بإبتسامه خفيفه ..

والموقف اللى بينلى بقى ان العربيه دى إئتلاف مصرى صِرف.....إن فى كمين فى الطريق سحب رخص السواق "" كنت فرحان فيه "

يدوب الرخص اتسحبت ولقيت كم التحليلات وكم التفسيرات للى حصل من كل الساده الركاب..

- المفروض يا اسطى كنت تدخل من الدوران الاول مش ده
- لا هو كان لازم يغمز امين الشرطه بعشره جنيه ولا حاجه" اللى اخد الرخص نقيب "
- انا لو مكانك ما امشيش من غير الرخص
- انت هتعرف تجيبها يااسطى لواايه .... شكلك طيب
- ايه الظلم ده ..... هو استعباط ولا ايه ...؟
واحد حزب وطنى بقى .... وشكله باين اوى انه وطنى يعنى .... القانون قانون ياجماعه هو اكيد عمل حاجه غلط ..
الحوار ختم بكلمة لواحد اخوانجى بقى ..... يا جماعه ده قدر ربنا ... مش يمكن كان حصله حاجه والعربيه اتحرقت مثلا .... الحمد لله على كل حال ... ربنا هيعوضك ...
خلص الموقف بمكالمه من السواق لواحد قريبه
- والنبى ياعم اسماعيل شوفلى كده حاتم بيه .......... اصل الرخص اتسحبت فى كمين .

اللى انا كتبت الكلام ده علشانه بقى ... هو انا اه مع قانون المرور قلبا وقالبا ... ومع النظام ومع ان النظام فى الشارع مش هيبقى حقييقى الا بقانون قوى .............. بس اللى مش معاه بقى ان الرخص تتاخد علشان ملزوق فى وش العربيه فى مساحه 15*10 كلمة ... الله اكبر

مش عارف بقى لو كان مكتوب ... لا اله الا الله ... محمد رسول الله ... كان حصل ايه ...؟
اللى اللقاء ف رحلات اخرى

9 اللى شرفونا بتعليقهم:

اسماء يقول...

ههههههههههههههههههههههههههههه
انا طبعا بضحك بصوت عالى
والله كلها مواقف تحفه
واسلوبك جامد جدا بسخريه
ياحمدى انت خساره فى البلد دى
ولازم تكتب فى مكان
هيبقى ليك قراء والله
تسلم ايدك بجد
ومتغبش علينا بحكاويك التحفه دى

غير معرف يقول...

والله رائع يا أختي

جميع شرائح المجتمع متجمعة في مكان واحد

وكمان اسلوب نقل الوقائع رائع جدا جدا جدا كالعادة طبعا

أرجوكي عاوز كل جديد ليكي

e_3asal يقول...

ههههههههههههههههههههههههههههههههههه

والله هو ده اللى بيحصل فعلا
وانت اسلوبك جامد جدا جدا
بجد اسلوبك مشوق وكانى فى قلب الاحداث
ههههههههههههه

مشكور على النقل المتميز

ومتغبش علينا بحكاويك الجميلة دى

sally يقول...

بجد رحله كانت سعيده يا حمدى .ههههههههه...احلى حاجه فيها ان انت كنت مبسوووط بعد المشوار الطويل اوى دا.... بس انا عندى شكوى مش انت محامى ..شوف يا سيدى واحد وعدنى ان هو مش هيكتب حاجه الا لما يعرفنى الاول و اتضح ان هو طنشنى خااالص و كمان ايه سافر من غير ما اعرف ...هستنى حكمك عليه يا حمدى باشا....

غير معرف يقول...

هههههههه الواحد بقاله كتير مضحكش كده
يس والله رحلة مسلية بدل ما كنت تقعد تفكر فى المشوار اللى هتروحه

حمدى جعوان يقول...

ماشى يا اسماء ... ناخد اقتراحك فى الحسبان ... وابقى قابلينى لو حد عبرنى

حمدى جعوان يقول...

متشكر اوى يا ايمان على المجامله دى .. انا عارف انك من الناس اللى دايمابيشجعوى .. ربنا يخليكى

حمدى جعوان يقول...

طبعا معندوش حق يا سالى .. اطلاقا... ومعلش عندى انا دى .. بلاش تزعلى... زعلك وحش انا عارف

غير معرف يقول...

احييك يا اخ حمدى على المقال الوصفى السردى دة بجد كل تقنيات الوصف والسرد متوافرة ومتداخله بطريقه مشوقه.احييك على المدونه كامله انابتابعها وبيعجبنى فيها اشياء كثيرة ولكن لى عليها بعض الماخذ ان شاء الله اجمعها وارسلها لك اه نسيت اقلك انا عرفتها صدفه شدنى ليها فى الاول اسمك اسم العيله يعنى محنا شكلنا جيران..فتحى

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .