5 تدوينة صغنونه

كل سنه وكلكم بخير يارب وان شاء الله يكون عيد مبروك علينا جميعا


وعلى اخواتنا المستضعفين فى كل مكان على الارض




...............................










  • الوزير فاروق حسنى وترشيحه لمنصب الأمين العام لمنظمة الأمم المتحدة للتربية والثقافة والعلوم "اليونسكو


موضوع كبير اخد كلام كتير وجدل اكتر ... يمكن ميكنش من اهتمامات المواطن العادى ( لان الغالبيه يعنى ميعرفش ان فى ثقافه اساسا) الموضوع فيه جدل كتير يمكن لانه متعلق بشخصيه وزير ( قريب من النظام ) طول الوقت فى جدل عليه وعلى مواقفه واراءه فى شوية حاجات كدا .... منها مثلا موقفه اللى قلب الشعب كله عليه من الحجاب وبوصفه له بانه مظهر من مظاهر التخلف والعوده للوراء .. اللى بعد كدا نفاه وقال انه كان كلام ليس للنشر واللى فى حواره للمصرى اليوم من كام يوم قال انه معندوش اعتراض على الحجاب ولكنه بيرفض النقاب تماما ... بالاضافة طبعا لانه من رجال الرئيس (22 سنه وزير ثقافه ) واللى طبعا كلنا عارفين انهم معندهمش مانع فى التطبيع مع اسرائيل .... وكمان دعوته للموسيقار الاسرائيلى لاحياء حفله فى دار الاوبرا .... وحضوره افتتاح معرض عن نابليون ومصر احتفال بذكرى الحمله الفرنسيه على مصر واللى كتب عنه وقتها الاستاذ فهمى هويدى بانه اهانه للذاكرة الوطنيه ..... وتراجعه عن كلمة قالها فى مجلس الشعب لنائب اخوانى لما قاله النائب ان فى كتب اسرائيليه فى المكتبات فى مصر والوزير قاله لولقيت الكتب دى هحرقها بايدى ... و و و



انا كنت بسال مثلا يعنى احنا كمصريين نفرح بانه يكون فى المنصب ده مواطن مصرى على الرغم من انه صاحب المواقف اللى فوق دى والمفرو ض نسانده ونفرح بكدا ...؟ ولا نخاف انه ينجح ويقدم تنازلات ( دا اكيد يعنى ) لو نجح وتكون مواقفه محسوبة علينا كمصريين ومسلمين خصوصا انه هيتعامل مع الحفريات الاسرائيليه تحت المسجد الاقصى .. ومع تهويد القدس وطمس الطابع العربى فيها ... وبصراحه بعد ما اسرائيل اعلنت انها هتوقف الحمله اللى كانت اعلنتها ضده دى حاجه تعمل قلق لان اسرائيل مش بتعمل حاجهه لله يعنى ... عموما هو الجوله الرابعه انهارده وعلى راى ستى .... بكره نقعد على الحيطه ونسمع الزيطه ..!!


____________________________________________



  • المستشار محمود الخضيرى استقال


المستشار محمود الخضيرى واحد من قضاة مصر المحترمين اللى دخلوا قلوب كل المصريين بمواقفه اللى بتقول انه من القلائل المحترمين .. الخبر قراته انهارده زعلت .. بس لما عرفت ان السبب هو تغول النظام الحاكم وسلطته التنفيذية على السلطة القضائية ويأسه فى ان البلد حالها هيتصلح ... وان دا يعتبر احتجاج منه يعنى فرحت شوية وزاد اعجابى بيه وقولت دا خبر يفضح النظام فى مصر ويوضح بان البلد فعلا محتاجه وقفه من كل الشرفاء اللى زيه ..... بس زعلت تانى لما فكرت ولقيت انه يعتبر ياس واحباط خصوصا لما تيجى من شخصية معروف عنها وقوفها مع الحق باستمرار .... وبكدا يكون التوحش اللى وصلت ليه السلطه بقى شبح بيقف قدام كل اصوات الحق .. ياترى مين بعدك يا سيادة المستشار ؟

5 اللى شرفونا بتعليقهم:

لبنــــــــــى يقول...

مسا الخير
و كل عام و انت بخير

بالنسبة للجزء الاول من التدوينة انت قلت اغلب الشعب ما بعرف انو في ثقافة و هادا الشي بتحمل جزء منو وزير الثقافة و وزير التربية و التعليم
و الاعتراضات اللي كانت بوجه حسني ما كانت عبثية او انو الشعب بكره الخير لبلدو انا كعربية كان ممكن افرح لو حدا تاني غير حسني ترشح و اخد المنصب لكن وزير الثقافة اللي ما عندو احترام للتوجهات ايا كانت و بهين ملايين المسلمين بتصريحاتو عن الحجاب ما اظن انو ايا كان رح يحترموا
مش مشان الدين بس و الحجاب لا
السبب الاخر انو كيف وزير ثقافة لبلد عربي و مسلم يبدي رايوا الشخصي و انتقادو بدوون احترام لهيبة المكانة اللي هو فيها و طبعا غير اخد قرارات و الرجوع عنها بطريقة مذلة
هادا الشخص ما اظن انو رح يشرف مصر او اي عربي باستلاموا المنصب و اظن انو بكفي فضايح قدام الغرب هو ما في احسن منو بمصر او بالعرب ليبيض وجهنا شوي ؟؟؟

بالنسبة للخبرية التانية انا شخصيا ما بعرف المستشار بس هادا شي طبيعي و مؤسف بنفس الوقت متل واقعنا

و بنرجع للعيد
شكرا للعيدية
و كل عام و انت بخير

حمدى جعوان يقول...

جفرا
كل سنه وانتى طيبه ان شاء الله
فعلا الاعتراضات اللى بتواجه الوزير فاروق حسنى مش من فراغ دى نتيجة مواقف واراء كانت هى السبب فى انه يواجه اعتراضات كتير على مدى وجوده فى الوزاره .... وفعلا زى ماقولتى خوفى ده من تاريخه فى موضوع انه ممكن يقدم تنازلات فى سبيل وجوده فى المنصب .. (والله اعلم ) وخصوصا انها منظمة ليها طابع حساس لانه هيحتك بامور ليها حساسيه خاصه عند العرب والمسلمين اهمها حفريات اسرائيل تحت الاقصى ...

عموما انهارده كانت الجوله الرابعه للتصويت وحصل على 29 صوت وتعادلت معاه المرشحه البلغارية بنفس عدد الاصوات بعد انسحاب المرشحه النمساوية وبكدا هيكون بكره اخر يوم فى التصويت واللى هيتحدد عليه مين هيشغل المنصب ... وربنا يقدم الخير


- المستشار محود الخضيرى علامة فى تاريخ القضاء وهو نائب رئيس محكمة النقض واستقالته هتعمل قلق شوية خصوصا انى سمعت انهارده انها ممكن تكون بداية لاستقالات كتير احتجاجا على تدخل النظام فى السلطه القضائيه

متشكر جدا ليكى يا جيفرا وكل عام وانتى بخير مره تانيه

غير معرف يقول...

ياريت ينجح .. شرف لينا يكون مصرى وعربى فى المنصب ده

ماتخافوش يقول...

الحمد لله اهوه فاروق حسني سقط وما نجحش

حمدى جعوان يقول...

يلا خليك مع الريس ياعم ..داحبيبك

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .