14 يعنى ايه ديموقراطيه وحرية وعدالة ومدنية.؟


هل فعلا احنا كشعب   " وليس كشريحة من الشعب المثقفه او على الاقل مطلعه "  مهيأين وقادرين على ممارسة الديموقراطية  وتفعيلها ..؟ وايه هو تفسيرنا للديموقراطيه  اصلا ..؟ وايه هو تفسيرنا للحرية ..؟ وايه هو تفسيرنا للدولة المدنية ..؟

اسئلة كتييير محتاجه لاجابات  اكتر   .. وقبل الاجابة محتاجين نكون فاهمين ومقتنعين بجد بالاجابة اللى هنقولها ولانى وللاسف شايف انه فى الوقت اللى كلنا حاربنا علشان الحرية والديموقراطية  اللى عاوزينها .. يوم ما ننتزعها ونحصل عليها  يكون معاها  اخطر شىء ممكن يهددها ويهدد ممارستها فى مصر وهو الجهل والامية ..

اوقات كتير بحاول اقنع نفسى بان مفيش خطر على ممارستنا الديموقراطيه والحرية  بس وللاسف برضه  كل الدلالات بتقول غير كدا بدايتا بالاستفتاء واللى حصل فيه  ودلوقتى واللى بيحصل فى قنا ..
مش قادر افهم هل الناس اللى مش عاوزه محافظ علشان قبطى .. هل الناس دى شاركت فى الثورة وكانت بتنادى بالحرية والعدالة ؟؟
هل دول الناس اللى طلعوا فى الشوارع وقالوا عاوزين ديموقراطيه ودولة مدنية ..؟ طيب ياترى لو قالوا كدا فعلا ايه مفهوم الديموقراطية والحرية والدولة المدنية  اللى كانت فى مخيلتهم 

احنا محتاجين نحط تعريف وبسرعه لكل المصطلحات دى ويكون فى توعيه للجميع وخصوصا فى ارياف مصر والقرى والحوارى والمناطق الشعبيه اللى منتشرة فيها الامية لانى شايف ان الجهل والامية اخطر حاجه هتواجهها مصر فى الفتره الجاية لان ممارسة الديموقراطية محتاجه وعى  
شايف ان غير الامية والجهل موجود تطرف فكرى  وطائفية بتظهر من وقت للتانى  كل دى  هتكون اشواك فى طريق مصر فى المرحله الجاية  ..
و التظاهر مع انه حق اصيل للانسان واخيرا انتزعناه كباقى الاستحقاقات اللى جنيناها من الثورة ولكن للاسف تانى  شوهنا الحق واصبح مهنه...... حتى لغة الحوار اللى قامت الثورة علشانها نسيناها والصوت العالى بقى اللغه  السايدة حتى لو كان الاعلام بيحاول يجمل الصورة شوية .
فى رايى انه لازم الدولة تقوم على المواطنة وكل مواطن مصر يحمل الجنسية المصرية  يكون له كل الحقوق وعليه كل الواجبات اللى بينظمها الدستور والقانون ومفيش اى تمييز لحد على حد سواء بدينة او لونه او عقيدته .. والحرية لازم تكون حرية مسئولة وليها سقف وهو معتقدات ومقدسات الاخر .. الطريق طويل بس محتاجين نبداه صح لاننا لو مبداناش صح والقانون هو اللى مشى على اكل من البداية هنتعب اوى بعد كدا
يمكن يكون كلامى فيه تشاؤم كتير بس اعتقد انه غير كدا ....... هو خوف وقلق لان الصورة مش واضحه فعلا 

ياريت كلنا نعطى تعريفات للمصطلحات اللى نادينا بيها فى ثورتنا 
الديموقراطيه والحرية والعدالة . وياترى احنا فعلا قادرين على الممارسة ؟ واية اكتر الاخطار اللى ممكن تواجه المكتسبات دى ؟

14 اللى شرفونا بتعليقهم:

Casper يقول...

مفهوم الديمقراطية صعب او ان صح التعبير واسع ومش الكل يفهمه او يعيه جيدا

تعليقا على مسألة المحافظ
اعتقد فيه لبس في الأمر

ده بوست للاخ مصطفى سيف
بيوضح فيه النقطة دي

http://6eyr-elramad.blogspot.com/

________

خالص تحياتي

دعاء العطار يقول...

معاك اننا محتاجين وعى كبييييير عشان الديمقراطيه تبقى ديمقراطيه مش فوضى

لكن موضوع قنا بعيد كللل البعد عن موضوع الطائفيه

المشكله ليست فى كونه قبطى

المشكله فى انه كان ظابط شرطه ومارس الوان من الفساد وتعذيب بعض المواطنين

اعتقد ان الاعلام فسر هذه القضيه على نحو خاطىء بشكل يشعل الفتنه الطائفيه

لكن انا معاك جدااااً فى الكلام عن الديمقراطيه وديمقراطيه بلا وعى كاااارثه فى ذاتها

عجبتنى جدااااً الصوره

دمت بكل الخير

(: (:

حمدى جعوان يقول...

والله يا كاسبر انا قرات البوست وبتمنى فعلا يكون الموضوع كدا ليس اكثر
المشكله انى موجود فى السعوديه حاليا وكل معلومات واخدها من القنوات والنت ومش متعايش بشكل شخصى مع الاوضاع فى مصر ودى حاجه تجنننننن بجد

حمدى جعوان يقول...

يارييت يادعاء ياريت بجد يكون دا التفسير
.. انك تكونى موجوده بره بلدك وتوصلك اخبار بالشكل ده صعبه جدا والله ...

زينة زيدان يقول...

ان الخلاف ليس بمفهوم الديمقراطية نفسها

الديمقراطية مفهوم واضح وصريح

إنما الخلاف على التطبيق او على تطبيق الديمقراطية بأي مفهوم...بمفهوم من نريد الديمقراطية

لدى العرب مفهوم خاص بهم
ولللغرب مفهوم خاص بهم
وللشباب مفهوم خاص بهم
وللاسلامين مفهوم خاص بهم
وللعلمانيين مفهوم خاص بهم

والأخطرمن ذلك ان كل من تلك الجهات يرى نفسه الحق وغيره الظلم ولا يستحق المشاركة في الوطن

تحيتي لطرحك المميز

ولكلماتك المعبرة

ولرسوماتك التي تشرح الموقف بصورة اعظم من ألف كلمة
كل الود

شمس النهار يقول...

المشكلة مش اني ادي تعريف
المشكلة في اللي بيحصل وان لازم اهل الثقة في كل مكان يتكلموا مع الناس اللي مش فاهمه
وليه بقول اهل الثقة
علشان في كل مكان الناس البسيطه بقت يابتصدق اي حاجه ياخايفة من اي حاجه مافيش وسط
علشان كده كل منطقة يتشاف مين اهل الثقة فيها ويتكلم مع الناس
لازم الناس تفهم اللي حصل في قنا ممكن يتكرر في اي حته

علي فكرة
فكرة الكاريكاتور جميلة

daloo3a يقول...

السلااااااام عليكم ورحمة الله وبركاته

اول شي انا مابعلق على الموضوع
ماعندي تعلييق له =)

بس كنت بقول لك لا تحط اغاني في مدونتك عشان ما تكسب ذنوب الناس
و بعدين انا دايما اعصب لأنك تحط اغنيه و انا اكون حاطه نشيد و يتسكر النشيد عشان الأغنيه اللي انت حاطنها تشتغل =(

كانت مجرد نصيحه ^^

Unknown يقول...

أخى الكريم
كثرت المصطلحات والتعريفات والمفاهيم .. وقل التطبيق والفهم والوعى وضعف الإدراك
نحن حالياً فى مرحلة مخاض ولانعرف كيف سيكون المولود الجديد ...
ماتسفر عنه الانتخابات القادمة من مجلسى الشعب والشورى وكذلك الرئاسة هى من ستحدد الطريق ......
ولكن من يرسم هذا الطريق هو أنا وأنت وهو وهى .... وجموع الشعب
وسيكتب الخطى علينا ومن كتبت عليه خطى مشاها.

زينة زيدان يقول...

الصديقة daloo3a

الصديق حمدي اسمح لي بالرد على صديقتك

"هذه ليست أغنية أختي
إنما هي قصيدة وطنية شعرية للشاعر محمود درويش..وإذا تفضلتي بسماعها فهي تصف وطني فلسطين..وهي تصف جرحنا وحبنا للأرض المباركة كما انها غير مصحوبة بالموسيقى..إذن فهي شبيهة بالنشيد الذي تسمعين...تقبلي كلماتي صديقتي
فما يجمعنا هنا إلا التفاهم والاحساس المشترك بهمومنا المشتركة...كل الحب لك عزيزتي

وللصديق حمدي جعوان كل التحية على مختاراتك الراقية والمعبرة والهادفة...

تحيتي للجميع"...

حمدى جعوان يقول...

زينه
----

والأخطرمن ذلك ان كل من تلك الجهات يرى نفسه الحق وغيره الظلم ولا يستحق المشاركة في الوطن


دى فعلا اخطر بكتير يا زينه
متشكر اوى لمرورك وتعليقك



شمس النهار
-------

احنا بجد محتاجين لاهل الثقه دول لانهم هما اللى قادرين على كدا
شكرا اوى واكيد يشرفنى ان الرسم عجبك

حمدى جعوان يقول...

دلوعه

وعليكم السلام وشرفتيييينى بزيارتك للمونه ونصيحتك اكييييد هفكر فيها والاخت زينه ليها راى كويس برضه ياريت تقرايه




استاذ محمد
--------

انت لخصت الموضوع فعلا
لكن من يرسم هذا الطريق هو أنا وأنت وهو وهى .... وجموع الشعب
وسيكتب الخطى علينا ومن كتبت عليه خطى مشاها.

اشكرك واشكر مرورك الكريم

دعاء العطار يقول...

فينك ياأستاذ حمدى ؟

مختفى ليه ؟

لعل المانع خيييير

حمدى جعوان يقول...

موجود والله يا دعاء بس فترة تأمل :)

مش عارف والله حالة عدم تركيز كدا وبعدين عاوز اغير القالب بس موجود ومتابع

الف شكر على سؤالك .. معندكيش فكرة كاريكاتير بقى ..؟:)

دعاء العطار يقول...

وخليتنا نقلق بس كدهوه واتارى حضرتك بتتأمل

طب ياريت بعد التأمل دهه ترجعلنا بمواضيع جامده

بالنسبه بقى للكاريكاتير

فأنا الأيام دى معلنه افلاسى من الأفكار D: :D

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .