واضح كدا ان الاخطبوط بول هيبقالوا شغل كتير فى مصر ( وهنطلع عينه من كتر التنبؤات )
وده طبعا لان فى مصر مفيش حاجه بتتحسب بالمنطق ودايما فى النتائج عكس رغبة الناس .......
جروب على الفس بوك اسمة ( الاخطبوط بول يختار البرادعى رئيسا لمصر ) واتكلمت عنه جريدة الدستور انهارده وزى ماقولت وفى اعتقادى انه هيكون له شغل كتير اوى فى مصر يعنى اليومين الجايين ومع بداية الدورى هنلاقى مثلا مين هياخد الدورى .... واحتمال يبدلوا الاخطبوط بول .. بمدحت شلبى ويبقى المنظر كدا
ممكن كمان ولان محاكمة هشام طلعت مصطفى طولت وبقت مسلسل بايخ ملوش ملامح نتجه للاخطبوط بول ويحل المشكله دى ويكون المنظر كدا
ازمة المحاميين والقضاه وبرضه لان كل يوم نقرا فشل العقلاء والوسطاء فى انهاء الازمة اكيد هيكون للاخطبوط بول دور فى الحوار ده ويكون الشكل كدا
انهارده جايبلكم كود كلنا محتاجينة اليومين دول ..... وهو بيظهر فى شمال او يمين اعلى المدونه حسب رغبتك والكود عباره عن شعاااار مرسيدس .. وده عملته مخصوص علشان نفضل فاكرين ان فى مسئول فى الحكومه المصرية كان فى الحكومه من 98 الى 2004 واخد رشوة من مرسيدس وحكومتنا المبجله النظيفه ملهاش مزاج تعلن عنه ... بس احنا بقى هنفضل نقرفها لغاية مانعرفه ...
طبعا ندخل على التخطيط وبعدين على اضافة اداه وبعدين اضافة html \ java script ونحط الكود ده وحفظ ... والنتيجة انه هيظهر اعلى يمين المدونه زى عندى كدا ... ولو عاوزين تغيروا مكانه للشمال مثلا يبقى نغير كلمة right اللى فى الكود واللى متكرره مرتين ونخليها left
بنقول كلام كتير وبطريقه تلقائيه تقريبا من غير ما نفكر فى معناه
زى مثلا
( تلت التلاته كام )"
( من رابع المستحيلات )
" نوم الظالم عبـــــــــــــــــــاده "
الجمله دى بصراحه هى اللى شدد انتباهى اوى انا بحثت فى جوجل عن معناها بس لقيت التوبيكات اللى على معناها عبارة عن اسئله والاعضاء بيقولوا اراء لهم بس مش مبنيه على اساس علمى المهم فضلت ورا الموضوع لغايه لما جبت التفسير العلمى لمعنى الجمله دى من استاذ دكتور مخ واعصاب فى المنصورة المعنى العام الجمله ان الانسان الظالم وهو صاحى بيعمل اعمال تغضب ربنا ويظلم الناس بافعاله وبيرتكب الاخطاء وهو نايم بقى بيرحم الناس من شره وبالتالى مش بياخد سيئات على اعماله لانه مش بيعمل حاجه اصلا دا كلام تمام اوى وهو صح مش غلط بس مش على اساس علمى التفسير ان ربنا سبحانه وتعالى خلق الانسان و سخر جميع اعضاءه تحت خدمته من ايدين ورجلين وحواس واجهزة واعضاء داخليه وعلشان كدا الانسان بيتحاسب على افعاله لان هو اللى بيسطير على نفسه الاساس العلمى بقى لمعنى الجمله ان عقل الانسان الباطن بيرسل اشارات للمخ والمخ بيرسل اشارات لباقى الاعضاء عن طريق خلايا الجسم للقيام بعمل معين " زى مثلا رد فعل الايد لو مسك شىء سخن " يبقى كل عمل الانسان بيعمله بيكون نابع من ارادته لما ينام بقى الخلايا بتسير فى مجراها الطبيعي دون تدخل من الانسان مجراها الطبيعي دا اللى هو دوران الخلايا داخل الجسم في اتجاه طواف الحجاج حول الكعبه " حركه عكس عقارب الساعه " ودى طريقه تسبيح الخلايا جوا جسم الانسان والطريقه دى ما بتحصلش الا والانسان نايم ودى طبعا كلها حسنات للشخص النايم علشان كدا فعلاااااااااااا " نوم الظالم عبــــــــــــــــــــــــاده "
كل سنه وانتوا جميــــــعا طيبين وبخير والف صحه يارب بصراحه كانت نيتى لما دخلت ادون دلوقتى انى اتكلم فى موضوع تانى خالص بعد المعايده الموضوع عن الحج والشعائر المقدسه وان من ضمن الحجاج مصريين وجزائريين وكان ليا شويه تعليقات بعد ما قريت العنوان دا فى جريده المصري اليوم انهارده بس رجعت تانى وقولت نفكر فى العيد ونفرح به بعيد عن التفكير مؤقتا فى اللى فات ويارب يكون عيد سعيد علينا كلنا عايزة اعرف بس اخبار الاضحيات اييييييه ؟
وخلال السنه دى اكييييييييييييييييييد مليون فى المية إستفدت حاجات كتير وعرفت ناس بجد بحترمهم جداا وبحترم تفكيرهم وعقولهم جدا جدا .... يمكن مقدرتش انشر المدونة اوى وكدا ودا لان السنه اللى فاتت دى من اصعب السنين اللى مرت عليا فى كل حاجه ( من غير تفاصيل يعنى ) ومجرد اللى وصلتله من خلال المدونه فى السنه دى وفــ وسط الظروف دى انا بعتبره إنجاز
فيلم قص ولزق .. شوفته اول مره كانت السنه اللى فاتت لما كان بيعرض على قناة سينما بتاعة قنوات اى آر تى ... وعلشان محدش يقول انى عندى كارت بقى وياخد عنى فكره وحشه الفيلم اتفرجت عليه عن طريق وصلة الدش المركزى ( يعنى ابتكار مصرى لمقاومة الاحتكار الاعلامى ) حتى كان ايامها اعلان عمرو خالد بتاع الوصلة ............. وكان نفسى اتكلم من وقتها على الفيلم ده بس معرفتش وامبارح بس شوفت الفيلم تانى صدفه .... المهم ....... انا مش هتكلم عن الفيلم وتفاصيله ولا عن الحاله الفنية الغاية فى الروعه اللى ظهر فيها ا بكل مافيه سيناريو وحوار واداء تمثيلى واخراج وتصوير وكل ادوات صناعة الفيلم ... ويمكن كانت حالة شاذه وهى اعجابى بفيلم من الافلام الجديده عموما وقتها يعنى ..
..حتى انا بعتبر الفيلم مجملاً من احسن افلام السينما المصرية على مر تاريخها ...
( من وجه نظرى المتواضعه طبعا )
هتكلم بس عن مشهد فى الفيلم وهو مشهد لشريف منير وفتحى عبد الوهاب ابطال الفيلم ...
الحوار اللى دار بينهم فى دقايق بيلخص تفاصيل حياة معظم شباب مصر وبيوضح فى نظرى أد ايه المعاناه اللى ممكن نمر بيها عموما فى حياتنا ..الطبيعى فيه انه بيكون احسن عمر بيمر بيه الانسان
السؤال اللى بيساله شريف منير فى المشهد ده خلانى وقتها افكر كتير وخلانى اسال نفس سؤاله ...!! وقولت هى فعلا البلد دى مفيهاش حاجه تديهالنا .... ولا إحنا اللى مش عارفين ناخد منها حاجه ..؟؟
الثلاثاء, يوليو 13, 2010
حمدى جعوان
