10 أنا جيييييييييييت



بسم الله الرحمن الرحيم

=============


حالة من الفرح الحمد لله مسيطره عليا وانا بكتب الكلام ده من مصر ...... ( حيث أنى قد أتيت الى مصر قادما من المملكه العربيه السعوديه فى رحلة عمل ... لم تكن طويله)

من الاخر يعنى


بجد فى فرحه كبيره جوايا وانا بكتب الكلام ده .. بكتب عن عودتى لمصر وخصوصا لما تيجى فى شهر رمضان وايامه اللى فعلا مالهاش طعم بره مصر ... رجعت بعد تَمن شهور فى السعوديه طبعا ولانى كانت اول مره ليا خارج مصر اكيد اتعلمت حاجات جديده واكيد اكتسبت خبرات ... بتمنى من ربنا انها تساعدنى لما ارجع تانى ... انا مش هتكلم عن تفاصيل التمن شهور ( لانها تفاصيل لا يعلمها الا الله ) انا هتكلم بس عن رحلتنا واحنا راجعين وبقول رحلتنا وحنا راجعين لانى كنت نازل مصر مع الاستاذ عادل زوج اختى صاحب مدونة قول يا الم .. ( آه اصل العيله دلوقتى بقى فيها مدونين كتير)


ودا رابط المدونه لان مش عارف فى تقريبا عطل فى الروابط فى مدونتى مش عارف من ايه







الرحله فى مجملها وبرغم التعب اللى ملوش حدووووود بس كانت جميله واجمل مافيها انك تكون نازل بلدك ومشتاق لكل شبر فيها ولكل الناس اللى فيها ( دا كان احساسى والله )


إ تحركنا من تبوك بعد السحور رايحين على العقبه ( المفروض كنا هنركب من ضبا بس مكنش فى رحلات فى اليوم ده لمصر ) عادل نازل مصر بعربيته اللى اتحملت كتييييييير اوى فى الطريق خصوصا فى مصر طبعا يعنى ... كان معانا حاجات كتير ومعظمها لناس معارف .. وصلنا العقبه تقريبا فى حدود الساعه تسعه الصبح .. كنا بندعى نلاقى رحلة لمصر فى اقرب وقت علشان الانتظار فى الموانى والاماكن دى بيبقى صعب اوى خصوصا اننا فى رمضان وكان الجو حر جدااااا .. عادل طبعا بما انه كان قائد الرحله نزل هو يحجزلنا ويحجز للعربيه والرحله الوحيده اللى كانت ومها لمصر كانت فى عباره هتمشى الساعه تلاته يعنى قدامنا بتاع 6 ساعات انتظار ....... كتيييييييير اوى ... المهم مش عارف ازاى ربنا هدانا وقدرنا نستنى والوقت ماشى بسرعة السحلفه .. المهم عدى الوقت والعباره اتحركت الساعه خمسة تقريبا ..وكانت بطيئه جداااا بس مش مهم .. الاهم اننا رايحيين مصر وقضيت معظ الوقت فوق العباره اشوف المية والناس كان جو جميل اوى .

وصلنا نويبع تقريبا كانت الساعه 9 يعنى اخدنا اربع ساعات من العقبه لنويبع ..


نزلنا مصر وبدانا رحله بمليون رحله من اللى فات... بداناها بعسكرى قابلنا اول ما نزلنا من العباره بالعربيه


- هااا عاوزين تعدوا على الجهاز ولا بلاش ؟؟!!!!!


- لا بلاش

- طيب حمدلله على السلامه .

اخدله مبلغ الاخ .. مش مننا بس طبعا جينا للجمارك ( مش هتكلم عن تفاصيلها اوى لانها كانت يعنى ... كدا ) المهم يعنى محدش شافنا فى المينا الا وطلب فلوس بنفسه ( قمة البجاحه يعنى) بس طبعا بما اننا فى مصر مستغربناش الموقف


من اول عسكرى قابلنا فى المينا لاخر موظف خاتملنا الاوراق على بوابة الخروج .

عرفنا اننا فى مصر كمان لما مشينا على الطرق اللى ملهاش حل .. طبقا للمواصفات المصرية ... يعنى خمسين مطب لكل مواطن وميت حفره لكل فردة كاوتش .. واللى فى جيبك لعسكرى

ماعلينا


مش مهم ادينا مروحين كله يهون وبلاش نتكلم فى الحاجات دى دلوقتى خلينا فرحانين شوية...




انتهت الرحلة بوصولى بلطيم ( بلدى يعنى ) بعد اذان الظهر تقريبا ..






دا فيديو لشوية جبال وصخور روعه كانت فى الطريق تبصلها تحس انها مليانه وجوه واشكال











وده فديو واحنا داخلين على العقبه وشايفين قدامنا ايلات الاسرائيليه .. عادل كان له اقتراح باننا نجيب بلدوزرات ونردمها ... هنشوف كمان فندق طابا












اليكم شوية صور من الرحله بس كمان شوية









دى صورة العربيه واحنا نازلين نصلى الفجر فى الطريق








دى صور للجبال والصخور اللى فى الطريق






























واحنا داخلين العقبه والمبنى الابيض اللى فى الناحية التانيه ده فندق طابا












الراجل العجوز ده فكرنى بفيلم تايتانيك ... طول الرحلة واقف كدا يبص للبحر


الصورة دى واحنا فى نويبع قبل الخروج

10 اللى شرفونا بتعليقهم:

حروف يقول...

حمدلله علي سلامة
نورتني بزيارتك
وكل سنة وانت طيب

Mona يقول...

حمدالله ع السلامة يا حمدى
نورت مصر

حمدى جعوان يقول...

حروف
==========

الله يسلمك
مدونتك رائعه بجد
وكل سنه وانتى طيبه


متفائله فى زمن الياس
=============

الله يسلمك يامنى دا نورك طبعا
وبعدين انتى فين تدويناتك . بلاش كسل بقى

غير معرف يقول...

حمدا لله على وصولك بالسلامه حمدى وكان نفسى انى اكون معاك ولكن قدر الله وماشاء فعل وانشاء الله نتقابل فى اسرع وقت باذن الله

حمدى جعوان يقول...

الله يسلمك يا ريس

غير معرف يقول...

يحمدى يحمدى يحمدى ريس اية بس انت اساس مو عارف انا مين هههههههههههههههههههههههههههههههههههه والله انا قاعد اضحك من ردك بقولك انا اللى كان بيلعب فى مركز الارتكاز معاكم يفنان الشعب حسام غالى!!!!!!
ممكن مهاجم الارسنال كمان خمن انت بقا

على فكرة ماعاد فى حسام غالى انا شعرى وقع يحمدى ..

kochia يقول...

حمد الله علي السلامة
وعقبال كل مرة

مي يقول...

حمد الله على السلامة
ويارب دايما وكل سنة وانت طيب
تحياتى يا جميييييل

حمدى جعوان يقول...

ياعم على انا عارف انك انت اللى غير معروف....... عاوز اشوفك يافاشل

__________________________



kochia

الله يسلمك ومتشكر اوى


_____________________

مى

الله يسلمك وكل سنه وانتى طيبه

غير معرف يقول...

يحمدىىىىىىىىىىىىىىىى ماهو انا دايما غير معروف ههههههه زى متقول شبح ماشى يعم وقولى انتوا بتلعبوا ولا اية
انا نفسى العب كورة والله خلاص يحمدى انا انهارت

 
Design by Free WordPress Themes | Bloggerized by Lasantha - Premium Blogger Themes | Grants For Single Moms | تعريب وتطوير : باســـم .